شەفەق نیوز/ ئومێد خۆشناو پارێزگار هەولێر، ئمڕوو سێشەممە، وت: وەخاتر رەوشەیل ژیان و گوزەرانی کاسبکارەیل، قەیەغەی هاتووچکن گشتگیر نەیایمن، ئەاوە بڕیار پەنابردن وە سەختەوکردن ریکارە مقەیەتیەکان ئەرا نواگردن لە بڵاوبوین ڤایرۆسەگە دایمن.

ئمڕوو، خۆشناو ئەرا رۆژنامەنووسەیل وت: لەوەر بەرزەوبوین ژمارەی تووشهاتنەکان وە پەتاگە، ئیمە لە دەیەی باڵای نواگردن ڤایڕۆس کۆڕۆنا و ژوور ئۆپراسیۆنەیل لە هەولێر، نیاز چەسپانن قەیەغەی هاتووچگن گشتگیر داشتیمن، وەلی وەخاتر رەوشەیل ژیان و گوزەرانی هاووڵاتییەیل ئەو ریکارەیلە سووکەو کردیمن.

وتیش؛ وەگەرد هاتن مانگ رەمەزان ئەوەسا پەیوەندیە کۆمەڵایەتیەکان فرەوە بوون، و بازاڕەیل و کار و کاسبکاری  ئاڵشت بوون، ئەراوە بایەدە پابەندی وە ریکارە مقەیەتیەکان بکریەێد.

وتیش: دەرەیل مزگەفتەیل ئەڕا موسەڵمانەیل واز کردیمن، و فرەی مەردمەگە رەی وەرەو مزگەفتەیل کەن و نماز خوەنن، ئەراوە بڕیار سەختەوکردن ریکارە مقەیەتیەکان لەناو مزگەفتەیل لەلایەن وەزارەت ئەوقاف دریا، و دووپات کرد ک ریکارەیل مزگەفتەیل لە ئمڕووەو کەفنە ئاست جیوەجیکردن.