سەرچەوەگە ئەرا ئاژانس شەفەق نیوز وت: ئەو دوو تووڕە تەقەلا دانە لە شەو سەر ساڵ لە هەولێر پەلامار جیوەجی بکەن.

دویای ئەوە، ئەنجومەن ئاسایش هەرێم کوردستان بەیاننامەیگ دەرکرد لەناوی دووپات لە دەسگیرکردن دوو تووڕەگە کرد، و هویردەکاری ئۆپراسیۆنەگە ئاشکرا کرد.

بەیاننامەگە ک رەسیە ئاژانس شەفەق نیوز وت:  هیزەیل ئاسایش توەنستن لە مانگ کانوون یەکەم لە ساڵ 2022 دوو تەقەلای پەلامار وەلایەن دوو تووڕ تیرۆرست لە شار هەولێر پویچەڵ بکەن.

وتیش: چوار کەس لەناو تووڕەگە دەسگیر کریان، ک وەلایەن سەرکردەیل ریخریاگ داعش رینمایی وەپیان دریەێد.

دیاری کرد ک دوو تووڕەگە حەمزە ئەیاد هاناوی ک وە سەیاف قوڕەیشی ناسریاگە، و موهاجر ئەحمەد تەواوی ک وە ئەبو جەعفەر ناسیاگە، لە 23ی کانوون یەکەم ساڵ 2022 دەسگیر کریان، ک سەیاف قوڕەیشی پلان داشتیە خوەی لە وەردەم دەروازەی سەرەکی بینای دەزگای دژەتیرۆر، وەرجە سەر ساڵ خوەی بتەقنێدەو،  وە دەسمیەتی دویەم تیرۆرست ئەبو جەعفەر، و هەمیش پلان ئەرا تەقانن ماشینیگ لە وەردەم بینای بنکەی ئاسایش عنکاوە دانانە. 

 دویەم تووڕەگەیش، تیرۆرست موسا ئیسماعیل عەلوان ئیسماعیل لەناوی بویە ک وە یەعقوب ناسیاگە، و تیرۆرست (م.أح) ک هەردوگیان لە کەمپ هۆل بوینە و بەشداری لە کوشتن چەن کەسیگ لەناو کەمپەگە کردنە، وتیش: ئی دوو تیرۆرستە  لە ساڵ 2022 هاتنەسە شار هەولێر و پلان ئەرا جیوەجیکردن کارەیل تیرۆری و کوشتن لەناو شار هەولێر وە فەرمان سەرکردەیل داعش دانانە.