شەفەق نیوز/ هۆکەر عەزیز قسەکەر وەناو پۆلیس پارێزگای هەولێر ئمڕوو یەکشەممە، خەوەردا ک کەسیگ وەدەس کەسوکارەیلی لە یەکیگ لەناوچەیل شارەگە کوشیا.

عەزیز ئەرا ئاژانس شەفەق نیوز وت: مەفرەزیل پۆلیس لە ساعەت پەنج شەفەق رووی کردنە شوون رووداوەگە لە گەڕەک شێخ ئەحمەد تا بنووڕن ( بەختیار رووستەم) لە داڵگبوی ١٩٨٩ وەچەقو کوشیاگە.

وتیش؛ وەگورەی ژنەفتن؛ ک قوربانیەگە وەدەس کەسوکارەیلی کوشیاگە، بەڵکم لێکۆڵینەوەگان ئەرا رەسین وە ووردەکاریەیل تاوانەگە وەردەوامن.

لەی مەوقە، وەڕێۆبەرایەتی پۆلیس پارێزگاگە لە بەیاننامەیگ ئمڕوو وت: بەش پۆلیس ناحیەی عەنکاوە و ناوەند پۆلیس ناوچەی تۆڕق و هاوکاری پۆلیس فریاکەفتن، لە گومرگ سەوزە و میوەگان لە هەولێر دەسگیر کەسیگ ناونریاگ (ع، ع، ح) کردن ک لە ساڵ ٢٠٠٩ وەگورەی مادەی ٤٠٥ لە یاسای سزاگان داواکریاگە.

بەیاننامەگە دیاریکرد ک هێزە ئەمنیەگان لەلای دەسنانە بان ماشینیگ  مارکەی کەیا فلات ودەوانچەیگ کلۆک و تفەنگیگ کلاشینکۆف.