شەفەق نیوز/ نێچیروان بارزانی سەرۆک هەرێم کوردستان، ئمڕوو دووشەممە، دویای پەلامارەیلیگ لەلاین ریخریاگ داعش لەبان هیزەیل عراق ک دویەکە ئەنجام دریا، پەیامیگ کلکرد.  

بارزانی لە بەیاننامیگ رەسیە ئاژانس شەفەق نیوز وت: زنجیرەی پەلامارەیل دویەشەو لەلایەن داعش لە بەغداد و سەڵاحەدین و کەرکوک لەبان هیزە چەکدارەیل و پۆلیس فیدراڵی، ک بوینە هووکار هەفت شەهید وزیاتر لە ٢٠ زەخمدار،  مەترسییگ راسی دروس کرد.  

بارزانی وتیش: جویلەی داعش وفاراونکردن رووبەر پەلامارەیل هەڕەشەیگ راسی لەبان ئارامی گشت عراق دروس کەێد، ک بایەتە وە جددی بخریەێدە وەرچەو و وەتونی جواوی بیریەێد. 

بارزانی هەمیش وت: ئەرا نواگردن پەلامارەیل داعش، بایەتە هاوکاری زیاتر لەناوبەین سوپا وهیزە چەکدارەیل وپێشمەرگە و دەزگای ئاسایش عراق وهەرێم کوردستان بوود، و لە خود وەختەگە زوور لە گرنگی وەردەوامبوین پاڵپشتیکردن هاوپەیمان ناودەوڵەتی دژ وە داعش لە عراق و هەرێم کوردستان کرد. 

بارزانی دەسنشان ئەرا ئەوە کرد ک رەوش ئاسایش وسیاسی عراق هاوکاری و هەماهەنگی ناوبەین گشت هیز لایەنەیل عراقی خوازێد،  وتیش: ئەو بەسیان سیاسیە بویە هووکار ململانە و نائارامی و زیایبوین چالاکیەیل داعش.   

هەمیش وت: باس لە خەفەت خوەم ئەرا خیزانەیل شەهیدەیل کەم، و ئومید خاسەوبوین وەزوییگ ئەرا زەخمدارەیل خوازم.