شەفەق نیوز/ نێچیروان بارزانی سەرۆک هەرێم کوردستان، ئمڕوو یەکشەممە، رینما داگە دامەزراوەیل و لایەنەیل پەیوەندیدار وە چەودێریکردن رەوشەیل ژیان و گوزەرانی کراکارەیل کوردستان.
ئەوەیش لە بەیاننامیگ لەلایەن سەرۆک نێچیروان بارزانی هات وەبوونەی یەک ئایار، جەژن کراکارەیل.
نێچیروان بارزانی وت: گەرمترین پیروزبایی ئەرا چین کراکارەیل کوردستان، و سەندیکا و ریخراگەیلیان پێشکەش کەم، وەگەرد کراکارەیل عراق و جەهان وەگشتی، دەس نەمە بان دەس کارکەریان و دەس زەحمەتکیشیان، و وەچەو رێزگردن و سوپاس نووڕمە رەنج و تەقەلا و دەوریان، و داوای سەرکەفتن ئەرایان خوازم.
وتیش: کراکارەیل جۊر چین گرنگ و کاریگەر لە کۆمەڵگای کوردستانی، وەگەرد قوربانییان و بەشداری کارگەریان لە خەبات و لە رزەیل پێشمەرگە، هەمیشە ئەو دەور دیارە لە دووارە ئاوەدانکردن و ئەوزەڵکردن وڵاتەگە دیرن.
سەرۆک هەرێم هەمیش جەخت کرد ک بایەتە رێز لە مافەیلیان ئەرا باڵاترین ئاست بگریەێد، و مقەیەتی ژیان و سەروەرییان بکریەێد، و بایەتە ریخراگەیلیان و سەندیکایان گورجتر و رێکتر بوود، تا بوونە مقەیتیکەریگ خاستر ئەرا ماف و شایستە و ساعەتەیل کاریان، و مسۆگەرکردن کار کراکارەیل لەسای رەوش و ژینگەیل کاریگ تەندروس بوون.
نێچیروان بارزانی وتیش: لەی بوونە، دووپات لە پاڵپشتیکردنمان ئەرا گشت ماف و داوایل شەرعی کراکارەیل کەیمن، و بایەتە دامەزراوەیل و لایەنەیل پەیوەندیدار لە هەرێم کوردستان چەودێری، لەسای یاسا، رەوشەیل ژیان و گوزەرانی کراکارەیل کوردستان بکەن، و تەقەلای خاسکردنیان بیەن، و چەودێری خیزان ئەو کراکارەیلە بکەن ک لە مەوقەیل کار گیانیان لەدەسدانە.
جەهان لە یەک مانگ ئایار لە گشت ساڵیگ، ئاهەنگ وە جەژن جەهانی کراکار کەێد، ک هەمیش وپی ئۊشن رووژ کار، و جەژن وەهار وکار، ک ئەو رووژە لە وڵاتەیل فرەیگ پشوو فەرمیە.