ئەوەیش لە کۆنگرەیگ رووژنامەوانی وەلایەن سەرۆک نێچیروان بارزانی هات ئەرا خستن رووشنایی وەبان ئەنجامەیل سەردانی ئەرا ئەڵمانیا و ئامادەبوینی لە کۆنگرەی میونخ ئەرا ئاسایش.
نێچیروان بارزانی وتیش: کۆنگرەی میونخ دەرفەتیگە ئەرا هەرێم کوردستان تا را و هویر خوەی وەشیوەیگ سرووشتی نشان بەێد و بڕەسنێدەی هاوبەشەیلی لەناو کۆمەڵگای ناودەوڵەتی وەبی پرۆتۆکۆلەیلیگ زیای، و باس ئەو دیدارەیلە وەگەرد کەسایەتیەیل کرد لە پەراویز کۆنگرەگە کرد ک گرنگ بویە تا بنووڕنە رایەیل هەرێم و هەمیش ئەوان رای خوەیان نشان بیەن.
وتیش: دیدارەیل زوور لەبان رەوشەیلمان کردن، و فرەتر زوور لەبان پەیوەندیەیلمان وەرد بەغداد، ک باوەت سەرەکی بوین لەناو گشت گردەوبوینەیل، دیاری کرد ک کۆمەڵگای ناودەوڵەتی وەشیوەی گشتی خوازێد دەسمیەتیمان بەێد ئەرا چارەکردن گرفتەیل ناوبەین هەرێم کوردستان و بەغدا.
سەرۆک هەرێم کوردستان وتیش: کۆمەڵگای ناودەوڵەتی نووڕێد گرنگە وەلایەن سیاسی ئارامی لە وڵاتەگە قایم بکریەێد، و چارەکردن گرفتەیل ناوبەین هەولێر و بەغدا هیلێد ئارامی وەشیوەیگ خاستر وەدەس باێد، و یە راسە.
وتیش: دووپات ئەرا گشت هاوبەشەیل کردیمن ک هەرێم کوردستان پاڵپشتی لە سەرۆک ئەنجومەن وەزیرەیل و حکومەت عراقی ئیسە کەێد، و خوازێد ناکۆکیەیل وەرد بەغداد لە چوارچیوەی دەستوور چارە بکریەێد، و ئومید دیریمن بەغدادیش هەر ئەو را بیاشتاد، و تەقەلایگ راسی لەی باوەتە بیەێد.
سەرۆک نێچیروان بارزانی باس باوەتیگتر کرد لەو گردەوبوینەیلە لە پەراویز کۆنگرەی میونخ ئەرا ئاسایش، ک خوەی جەنگ ناوبەین رووسیا و ئۆکرانیا بوی، و لەی چوارچیوە باس باوەت وزە کریا ک ئەرا ئەو وڵاتەیلە گرنگە، وتیش: عراق و هەرێم کوردستانیش تواتێد دەور گەورەیگ لە چین وزە جیوەجی بکەێد.
و دووپات کرد ک هەرێم کوردستان پایەیگ تایبەت لەلای کۆمەڵگای ناودەوڵەتی دیرێد.
وتیش: تا ئیسە باوەت تیرۆر و ریخریاگ داعش وەلایەن کۆمەڵگای ناودەوڵەتی وە هەڕەشەیگ راسی دانریاگە، و یەیش وەگەرد خود نووڕین ئیمە پووڕیاگە، ک هیمان ریخریاگ داعش لەناو نەچگە، و توەنێد هەڕەشەیگ راسی لە شیوانن ئارامی عراق دروس بکەێد.
نێچیروان بارزانی وتیش: گشت شاندەیل ک چەومان وەپیان کەفت هانیان لەبان یەکڕزی کورد بوی، و گشت لایەن و حزبەیل سیاسی گرفتەیل ناوخوەییان یەکلاوە بکەن، و گشتیان یەک فراکسیۆن بوون، تا گرفتەیل وەرد بەغداد چارە بکەن.
دووپات کرد ک هەڕەشەیل تیرۆر هەر هەس، چ لە عراق یا لە هەرێم کوردستان یا لە خوەرهەڵات ناوڕاس، و لەناو گردەوبیونەیل سوپاس ئەرا ئەمریکی و ئەوروپیەیل پیشکەش کردیمن، ئەرا ئەو پاڵپشتیکردنە وەلایانەو لە چین وەردەوامی پشتگیریکردن لە دژایەتی تیرۆر و مەترسیەیلی، و ئامادەیی خوەمان لە وەردەوامی هاوکاری و هەماهەنگی لەی چینە نشان دایمن.
لەباوەت ئەو چەوپیکەفتنیە وەگەرد محمد شیاع سودانی سەرۆک وەزیرەیل لە پەراویز کۆنگرەی میونخ، سەرۆک نێچیروان بارزانی وت: خوەی و سودانی دووپات لەبان گرنگی چارەکردن گرفتەیل ناوبەین حکومەت هەرێم کوردستان و حکومەت فیدڕاڵی وە زویترین وەخت کردن، وتیش: باس سەردان هەفتەی گوزەشتەی شاند هەرێم کوردستان ئەرا بەغداد کردیمن.