شەفەق نیوز/ نێچیروان بارزانی سەرۆک هەرێم کوردستان، وەگەرد باڵیۆز بەریتانیا لەلای عراق هاوڕا بوین لە گرنگی پەیابوین حکومەتیگ بڕەسێدە ئەنجام ئارامییگ سیاسی و ئەمنی.  

سەرۆکایەتی هەرێم کوردستان لە بەیاننامیگ رەسیە ئاژانس شەفەق نیوز وت: نێچیروان بارزانی سەرۆک هەرێم کوردستان، ئمڕوو چوارشەممە، پیشوازی لە مایک برایسون ریچاردسون باڵیۆز بەریتانیا لە عراق و شاند یاوەری کرد.  

وەگورەی بەیاننامەگە، لە دیدارەگە باس گەشەیل دویایین کریا ک رەوش سیاسی لە عراق وەخوەی دوینێد، و پەسەنکردن کاندید پۆست سەرۆک وەزیرەیل هاتگ ئەرا حکومەت فیدراڵی، پەیوەندیەیل هەولێر-بەغداد،  و گرفتەیل گیرهاتگ ناوبەینیان، تایبەت لە کەرت نەفت وگاز، گورزەیل دویایین لەبان گێلگەی کورمۆر گازی، و تووپواران شوینیگ گەشتیاری لە زاخۆ لە هەفتەی گوزەشتە. 

هەردوگ لایەنەگە هاوڕا بوین لە گرنگی چارەکردن گرفتەیل هەولێر-بەغداد وپەیانبوین حکومەتیگ بڕەسێدە ئەنجام بتەوکردن ئارامی سیاسی و ئەمنی، و توانای پیشکەشکردن خزمەتگوزاری و دابینکردن دەرفەتەیل کار ئەرا هاوڵاتیەیل عراق بیاشتاد، وداوکاری عراقیەیل جیوەجی بکەێد. 

لەی باوەتە، سەرۆک نێچیروان بارزانی جەخت لەبان گرنگی وەردەوامبوین گفتوگۆ ناوبەین حکومەت هەرێم کوردستان و حکومەت فیدراڵی کرد، ئەرا چارەکردن گرفتەیل گیرهاتگ ناوبەینیان تایبەت لە باوەت نەفت وگاز، وهەمیش گرنگی ئەوە ک چارەکردن گرفتەیل هەولێر-بەغداد لە یەکەمەیل کار حکومەت هاتگ بوود.  

بەیاننامەگە وتیش: هەڵوژاردن هاتگ، وگرنگی یەکڕزی لایەنەیل سیاسی لە هەرێم کوردستان، رەوشەیل شنگال، پەیوەندیەیل عراق و هەرێم کوردستان وەگەرد دەوڵەتەیل هاوسا، دویاتریان نووەیل لە باوەت سوریا، و بڕیگ لەو باوەتەیلە ک لەلای هەردوگ لایەنەگە گرنگە لەو دیدارە باس کریا ک دێڤید هانت قونسڵ گشتی بەریتانیا لە هەرێم کوردستان ئامادەی بوی.