شەفەق نیوز/ نێچیروان بارزانی سەرۆک هەرێم کوردستان وت: بڕیار دادگای فیدراڵی لەباوەت یاسای نەفت وگاز لە هەرێم کوردستان، دەستووری نییە، و پشت وە یاسای سەردەم رژیم وەرین بەسا.
بارزانی لە بەیاننامەیگ وت: لەی مەوقە ک عراق وە رەوشەیل سیاسی شیواشیویگ رەد بوود، بڕیاریگ لە دادگای فیدراڵی دەرچگ باس یاسای نەفت و گاز لە هەرێم کوردستان وە نادەستووری کەێد، و بڕوا دیریمن ک ئی بڕیارە ک وە یاسای سەردەم رژیم وەرین پشت بەساگە، بنەمایل فیدراڵی و مافەیل دەستووری هەرێم کوردستان خستە پشتگووش، و وەگەرد هەس دەستوور و سیستەم فیدراڵی نێگونجیەێد، وتیش: لەبان زەۊ راسی شۊن جیوەجیکردن نەیرێد.
وتیش: بڕوا دیریمن ک دادگای فیدراڵی لەجیای ئی بڕیارە بایەتبۊ بڕیاریگ بیاتاد چارەی گرفتەیل نەفت و گاز وەگەرد هەرێم وەگورەی دەستوور بکردیاد، و لە بەرژەوەنی گشت گەل عراق بوود. سەرۆک هەرێم کوردستان وتیش: چەوەڕی لە دادگای فیدراڵی باڵای عراقی کەیمن دووارە بنووڕێدە ئی بڕیارە، و مافەیل دەستووری هەرێم کوردستان بخەێدە وەرچەو، تا پێشەلکردن مافەیل یاسایی و دەستووری هەرێم کوردستان نەکریەێد، وەگەرد ئەوەیش رەوش سیاسی زیاتر نەشیویەێد، و نەوودە زەرەدیگ لەبان بەرژەوەنی عراق وەشیوەی گشتی.
وەرجەیە، رووژ سێشەممە، دادگای فیدراڵی بڕیاری وە نادەستووری یاسای نەفت و گاز حکومەت هەرێم کوردستان دەرکرد، وەگەرد پابەندکردن حکومەت هەرێم ک گشت بەرهەم نەفتەگە لە هەرێم کوردستان و ئەو ناوچەیلە ک سامانە سروشتییەیلە لە حکومەت هەرێم کوردستان لەلیان نەفت دراوردیە بەێدە دەس حکومەت فیدراڵی لەلای وەزارەت نەفت فیدراڵی، و ری وەپی بیەێد دەسەڵات دەستووری لەباوەت پەیاکردن نەفت و دراوردنی و هەناردەکردنی وەجی بارێد.
وتیش: وەزارەت نەفت ماف دیرێد چەودیری پۆچەڵهاتن گریەبەسیەیل نەفتی بکەێد ک حکومەت هەرێم کوردستان وەگەرد لایەنەیل دەیشتەکی لە دەوڵەت و کۆمپانیایل دەربارەی پریاکردن نەفت و دراوردنی و هەناردەکردنی و فرووشتنی بکەێد، و پابەند حکومەت هەرێم کوردستان بکەێد تا ری وە وەزارەت نەفت عراق و دیوان چەودیری دارایی فیدراڵی بیەێد ئەرا هۊردبۊنی و دیاریکرد مافەیل دارایی لە گەردن حکومەت هەرێم کوردستان، و بەش هەرێم کوردستان لە بوودجەی گشتی دیاری بکریەێد، وەو شیوە ک رەسین مافەیل هاووڵاتییەیل پارێزگایل هەرێم کوردستان لە بوودجەی گشتی مسۆگەر بکەێد، و دیریش نەکەفێد، و ئاگادارکردن حکومەت فیدراڵی و دیوان چەودیری دارایی فیدراڵی وەوە.