پەیامنێر ئاژانس شەفەق نیوز وت خوەنیشاندەرەیل ری سرەکی ناوڕاس شار سلێمانی بەسانە کە ناسریاگە وە جادەی "سالم" روی کردنە وەڕیوبەرایەتی گشتی پارێزگای سلێمانی.
دیاریکرد هەریەک لە مامووسایەل کەلار و کفری و سەێدسادق و رانیە و هەڵەبجە خوەنیشاندان رێکخسن لەنوای وەڕیوبەرایەتیەیل گشتی پەروەردەی ناوچەیلیان ئەرا داواکردن شایستەدارایەیلیان و هەمیش جویر پاڵپشتییگ ئەرا خونیشاندەرەیل سلێمانی.
ئەحمەد محەمەد مامووسا لە بەش زانستی ژیانیەگان لە زانکۆی سلێمانی وە ئاژانس شەفەق نیوز وت، ئەوان وە تەواوی وە ئاگان لەوەگ لە پشت پەروەردە روی دەێد وە تایبەت ئەوەگ پەیوەنی دانوستانەیل شاند هەرێم وەگەرد بەغداد دیرێد ئەو نواچگنەیلە دۆسیەگە وەپی رەسێد.
دیاریکرد " پرۆسەی جەم کردن واژوو دەسوەپیکردیە وەلایەن فەرمانبەرەیل هەرێم ئەرا گواستنەوەی مووچەیلیان ئەرا بان بەغدا و کۆبوونەوەیل پەیوەنیدار وەگەرد لیژنەی دارایی لە ئەنجومەن نوێنەرەیل عراق ناچار حکومەت هەرێم کوردستان کەێد جاریگتر روی بکەێدە بەغدا و گشت ناوەیل فەرمانبەرەیل رادەس حکومەت فیدرالی بکەێد".
دووپاتکرد" خوەنیشاندەرەیل دووپاتکەن لەوەگ واز لە مافەیلیان نیەتێرن داوای کەن و وەردەوامن لە مانگردن و خوەنیشاندان تا لە کۆتایی داواکاریان جیوەجی کریەێد".