شه‌فه‌ق نيوز/ كۆمسيۆن مافه‌يل ئاده‌ميزاد له عراق، ئه‌و دسدريژيه‌يله شه‌رمه‌زار كرد ك لايه‌نه‌لييگ نه‌ناسرياێ ئه‌نجامى دانه ئه‌را بان قه‌وره‌يل رووڵه‌يل تايفه‌ى كاكه‌يى له قه‌ورسان ئيمام بانكان له نزيك ئاوايى سه‌فيه سه‌ر وه ناحيه‌ى گوێر ك له‌ڕوێ ئدارييه‌و ها بان پاريزگاى نه‌ينه‌وا.
له‌ى باوه‌ته‌و، به‌سمه محه‌مه‌د مسته‌فا ئه‌ندام ئه‌نجومه‌نه‌گه له به‌ياننامه‌يگ ئه‌را شه‌فه‌ق نيوز وت: ئيچنه رويداگه‌يليگ ئامانج له‌ليان بڵاوكردنه‌وه‌ى ئاشووگه‌ريه ئه‌را ئه‌وه‌گ زه‌ره‌د وه ژيان هاوبه‌ش و ئاشتيانه بڕه‌سنێد له‌ناونى پيكهاته‌يل.
جى باسه، مسته‌فا وت: كۆمسيۆنه‌گه ده‌س ئه‌كاده دامه‌زرانن ليژنه‌يگ تايبه‌ت له نويسينگه‌گه‌ى له نه‌ينه‌وا ئه‌را ده‌رخستن راسيه‌يل ئى كاره‌و داوايش له لايه‌نه‌يل په‌يوه‌نديدار له ناوچه‌گه كرد په‌يجوورى بكه‌ن و ئه‌و كه‌س و لايه‌نه‌يله ئاشكرا بكه‌ن ئه‌و كاره‌يل نائه‌خلاقيه ئه‌نجام ئه‌يه‌ن و پيشكه‌شيان وه دادگا بكه‌ن.