سەرچەوەگە ئەرا ئاژانس شەفەق نیوز وت: سەرۆکایەتی وەزیرەیل فەرمان ئەرکدارکردن (فەرید موسا ئیبراهیم قەرەلووس) پویچەڵ کرد، کە لە ئایار گوزەشتە دەرچگە، ئەوەیش لەوەر تەواونەکردن مەرجەیل ئیداری، وتیش؛ فەرید قەرەلووس وەگورەی مەرجەیل ئیداری نییە ئەرا پۆستەگە، لەوەر کەمی ساڵەیل خزمەت ئیداریی کە بایەسە ١٠ ساڵ بوود.

دیاری کرد کە فەرید قەرەلووس کار ئەندام ئەنجومەن ناوخوەیی کردیە لە پارێزگای بەغدا باوجی ئەوە وەگورەی رینمایل دەستووری وە خزمەت ئیداری نیەێدە قەڵەم، وتیش؛ هیمان پۆست قایمقام مەنەلی چووڵە.

لەلای خوەییش مازن خوزاعی وەڕیەوبەر ناحیەی قەزانیە کە مەنەلی وەڕیەو بەێد، ئەرا ئاژانس شەفەق نیوز وت: تا ئیسە جویر ناحیە وەگەرد مەنەلی رەفتار کەیمن، هەرچەن موهر قەزاگە دەرچگە تا ئەوەنە قایمقام نوو دانریەێد.

لە مانگ ئادار گوزەشتە، وەزارەت پلانسازی عراق، دووارە نووەوکردن قەزای مەنەلی لە پارێزگای دیالە راگەیان، کە وەرجەیە لە قەزا بویەسە ناحیە.

رژیم وەرین، وە تەمەی تەها یاسین رەمەزان کە وەرپرس دەسەی کاروبار باکوور بوی، لە ساڵ ١٩٨٧ قەزای مەنەلی کردە ناحیە، وەگەرد بارکردن کوردەیل و زەفتکردن ماڵ و زەوییان لەناو پلانەیل تەعریبکردن.

قەزای مەنەلی، فرەی دانیشتگەیلی کورد فەیلی بوی، کە رژیم بەعس لە کۆتایی هەفتایل و سەرەتای هەشتایل سەدەی گوزەشتە، دەسکردە هەڵمەت گەورەیگ ئەرا بارکردنیان، و رەگەزنامەی عراقی لەلیان سەنەو، و دەسنابان پویل و دارایی و ماڵدارییان.

کوردەیل فەیلی، لە سەردەم حکومڕانی سەرۆک وەرین ئەحمەد حەسەن بەکر لە ساڵەیل ١٩٧٠ و ١٩٧٥ کەفتنە وەر بارکردن و دەسگیرکردن، ئیجا لە حکومڕانی سەدام حسێن لە ساڵ ١٩٨٠.