ئەوەیش لە وتاریگ لەناو کۆنگرەی زانستی ناودەوڵەتی ئەرا جینۆسایدکردن گەڵ کورد (جینۆسایدکردن کورد فەیلی) لە شار هەولێر هات، ک وەچەودیاریکردن خوەی وەڕیەو چوود، و وەئامادەبوین نێچیروان بارزانی سەرۆک هەرێم کوردستان، و مەسرور بارزانی سەرۆک وەزیرەیل هەرێم کوردستان.
مەسعود بارزانی لە وتارەگەی وت: باوە ک کورد فەیلی بەش سەرەکیە لە گەل کورد کەلەلی جیاوە نیوود، و وەئازایی وەرخودان گشت تەقەلای تاویانیان کردن، و لەبان گشت ئەو تەقەلایلە، مقیەتی ناسنامە و کەلتور خوەیان کردن، هەرچەن کەفتنە وەر ستەم و کوشتن و بڕین دووانەکی.
وتیش: خەباتکارەیل فەیلی وە توانایی دەسمیەتی لە دامەزریان پارت دیموکرات کوردستان دان، و بەشداری لە شووڕش ئەیلوول کردن، و فرە لە ئامادەبویەیل زانن ک سەرکردەیل باڵا کورد فەیلی لەناویان بوی، جویر سکرتێر حزبەگە، و خانمە سەرۆک یەکێتی ژنەیل کوردستان، و سەرۆک یەکێتی خوەنەوارەیل کوردستان، و بڕیگ لە پۆست گرنگ.
بارزانی وتیش: فیلەیل بوینە خاوەن بڕوا و رێزیگ لەلای بارزانی نەمر، ئەوەیش چوینکە دڵسووز و رەنجدەر بوین لە کار و لایەنگرییان، و دووپات کرد ک فەیلیەیل کەفتنە وەر زیان و کارەسات گەورەیگ، رژیم وەرین وەگشت شیوەیگ خوازێد لە هەڵوێست نەتەوەیی و نیشتمانی خوەیان واز بارن، وەلێ ئەو رەفتارەیلە شکست هاوردن، تا پەنا وە رەفتارەیل وەحشیانە بردن، جویر دویرەوخستن زوورکاری وە دەسپیچگ ئەوە ک بیگانە بوینە، و زەفتکردن دارایی و ماڵدارییان، و لەوە گەنتر، ئەو شمارە ک گومان لەلی نییە، ک ١٢ هەزار گەنج بوین، و شایەت شمارەگە فرە زیاترە، وەلێ ئی شمارە دڵنیاییە لە تەمەن ١٨ تا ٣٠ ساڵان وەشیوەیگ وەحشیانە سەرنقوم کریان، و کەسیگ تا ئیسە نیەزانێد لەکوورە نریانە خاک.
وتیش: بیگومان لە ساڵ ١٩٨١ تاقیکردن کیمیایی لە ناوچەی عکاشات لەبان ٣٠٠ گەنج فەیلی کریا، و دویای ئەوە خود کارەکە وە ١٥٠ گەنج بارزانی کریا.
مەسعود بارزانی وتیش: نەهامەتی و جینۆسایدکردن کورد فەیلی هەڵقەیگە لە زنجیرەی تاوانەیل لەبان گەل کوردستان، و گشتمان ئەوە دیمن ک وەسەر ئێزدیەیل هات، لە کارەسات جینۆسایدکردن، وتیش: گەل کوردستان قەت ئی تاوانەیلە لەهویر نیوەێد، وەلێ هەناێ دەرفەت کەفتە دەسی، رەوشتی بەرز بوی، و توڵەی نەسن، وەلێ ئەو تاوانەیلە لەهویری نیەچوود.
مەسعود بارزانی سەرۆک پارت دیموکرات کوردستان پێشنیار دامەزریان ناوەندیگ لە هەولێر پیشکەش کرد، ئەرا وەشوینکەفتن باوەتەیل گشت کوردەیل فەیلی، و ئی نویسینگە جویر مەرجعیگ ئەرا گشت کوردەیل فەیلی بوود.