شەفەق نیوز/ مەڵا بەختیار،  ئمڕوو یەکشەممە،  توومەتبار لایەنەیلیگ لەناو یەکێتی حزبەگەی کرد وە ژەهراوکردنەگەی.    

مەڵا بەختیار لە کۆنگرەیگ رۆژنامەوانی، ئمڕوو لە سلێمانی، و ئاژانس شەفەق نیوز ئامادەی بۊی وت: لە ناو یەکێتی نیشتمانی کوردستان ژەهرخوەر کریانە، و ئی تاوانە وەرجە هەشت تەموز گوزەیشتە وەپیم کریا وەگورەی ئەوەگ کەفتە دەس دەزگای زانیاری.     

وتیش؛ ژەهراویکردنم لە بەرزترین ئاستەیل پزشکی چەسپیا، و باس ئەوە وە تاوانیگ سیاسی ٢ حزبی کرد.    

مەڵا بەختیار دووپات کرد ک توومەتبار کەس نێکەێد تا لێکۆڵینەوەی باوەتەگە تەواو بوود، چۊنکە توومەتبار بیگوناهە تا ئەوەنە تاوانەگەی چەسپیەێد، باوجی وتیش؛ واز لە ماف خوەم نیارم.   

مەڵا بەختیار پەیمان دا ک ئەگەر ئەوەگ دەسی هاناو تەقەلای کوشتنی وەپای خوەی هات و دان وە تاوان خوەی دا، ئەوەسا وەخشێدەی، و ری وەکەسیش نیەێد ئەگەر یەکێتییش بۊیە نوای بگرێد.