شەفەق نیوز/ لە پارێزگای سلێمانی، ئمڕوو سێشەممە، دەسکریا چالاکیەیل پێشانگای ناودەوڵەتی یەکەم ئەرا بینا وئاوادانکردن، وە بەشداریکردن کۆمپانیایلیگ ناوخوەیی وبیگانە، و پارێزگار سلێمانی دووپات لە ئامادەبوین ئەرا گەشەکردن لە گشت چینەیل کرد، وداوا لە هاوسایل هەرێم کوردستان کرد هاوکاری و گەشتیاری شارستانی زیای بکەن لەجیای وەکارهاوردن تووپ و فڕۆکەیل جەنگی.

پەیامنێر ئاژانس شەفەق نيوز وت: چالاکیەیل پێشانگای ناودەوڵەتی یەکەم (CHP) ئەرا بیناکردن و کارەبا و کەووڵەیل لە سلێمانی وە بەشداریکردن ١٢٢ کۆمپانیای ناوخوەیی و هەفت دەوڵەت بیگانە دەسوەپی کرد، و وەلایەن هەڤاڵ ئەبوبەکر پارێزگار سلێمانی وازی کریا، وە بەشداریکردن پارێزگار هەڵەبجە و قونسوڵ ئیران و کەسەیاتیەیلیگ بازرگانی.

پارێزگار سلێمانی لە وتارەگەی وەناو پارێزگای سلێمانی و ژوور بازرگانی و پیشەسازی سلێمانی و یەکێتی بەرهەمهاورەیل کوردستان و یەکێتی هەناردەکارەیل وهاوردەکارەیل لە کوردستان، ژینگەی پیشەسازی وئەوزەڵکردن لە سلێمانی و هەرێم کوردستان نمایش کرد، و دیاری کرد ک سلێمانی شایستەی هەر پیشکەفتنێگ ئاوەدانی و ئابووری و بازرگانیە.

ئەبوبەکر وتیش: ئاست گواستنەوەی بازرگانی ناوبەین سلێمانی و ئیران وە هاوکاری هەردوگ لایەنەگە زیایەو بوی، و داوا لە هاوسایل کرد هاوکاری و گەشتیاری شارستانی لەجیای تووپ و فڕۆکەیل جەنگی زیای بکەن.

لەلای خوەییش، مەڵا یاسین محمود قسەکەر وەناو یەکێتی بەرهەمهاورەیل کوردستان لە وتارەگەی وت: پارێزگای سلێمانی گرنگە ئەرا ئابووری گشت هەرێم کوردستان، باوجی وەداخەو حکومەت هەرێم کوردستان و وەزارەتەیل پەیوەندیدار لاواز وخەمسەردە لە وەڕیەوبەردن ئی باوەتە.