شەفەق نیوز/ فەرماندەی نوو هێزەیل ئەڵمانیا لە هەرێم کوردستان، ئمڕوو یەکشەممە، دووپاتکرد لە وەردەوامی پشتگیری وهەماهەنگی وهاوکاریەیل وڵاتەگەی ئەرا هێزەیل پێشمەرگە لە لایەنەیل لۆجستی و راهێنان و ئامادەکردن ئەرا نواگردن تیرۆر.

وەزارت پێشمەرگە لە بەیاننامەیگ رەسیە ئاژانس شەفەق نیوز وت: شۆڕش ئیسماعیل وەزیر پێشمەرگە، ئمڕوو لە هەولێر، پێشوازی کرد لە کۆلۆنێڵ نو گاڕدی فەرماندەی هێزەیل ئەڵمانیا ، وتیمیگ پایە بەرز لە راوێژکارە سەربازیەگان ئەڵمانیا، وئاماژەکرد ک نو گاڕدی خەوەردا ئیسماعیل ک وە بڕیاریگ لە وەزارت وەرگری ئەڵمانیا ئەرک فەرماندەی هێزەیل و راوێژکارەیل ئەڵمانیا لە هەولێر وەرگرد.

بەیاننامەگە ئاماژەدا ک نوگاڕدی دووپاتکرد لە پشتگیری وهەماهەنگی وهاوکارەیل وەزارت وەرگری ئەڵمانیا ئەرا وەزارت پێشمەرگە وهێزەیلی لە لایەن لۆجستی و راهێنان و ئامادەکردن ئەرا نواگردن تیرۆر وتیرۆرستەیل داعش لە ناوچەگە، ک هیمان مەترسییان هەڕەشەی ناوچەگە دەێد.

بەیاننامەگە وتیش؛ وەزیر پێشمەرگە باس لە رێز خوەی کرد لە هەڵوێست گەل وحکومەت ئەڵمانیا لە هاوکاری وهەماهەنگی وەگەەرد پێشمەرگە و حکومەت کوردستان، و دووپاتکرد ک ئەو هاوکاریەیلە و ئەو هەماهەنگی سەربازی ئەڵمانیە لە چەنگەگە دژوە تیرۆر گرنگی وەزارەتەگە دروس کەێد و کاریگەری گەورایگ داشت لە گەشەکردن و بەرزەوکردن توانایل هێزەیل پێشمەرگە لە لایەن سەربازی ورێکخستنی.

بەیاننامەگە ئاماژەدا ک وەزارەتەگە بیجگە هاوکاریە سەربایەگە، ئەرزشدار پشتگیری دبلۆماسی وسیاسی کرد لە نوای وەزارت پێشمەرگە وکەل کوردستان، وشانازی کەیمن وە برادەری وکار هاوبەشی وەگەرد لایەن ئەڵمانی.

بەیاننامەگە ئاماژەدا ک لە یەکەم چەوپیکەفتنەگە لەناوبەین وەزیر پێشمەرگە و فەرماندەی نوو هێزەیل ئەڵمانیا، باسکردن لە رووادوە دویایینەگان لە هەرێم وعراق، ودووپاتکریا  لە نزیکەوبوینیگ زیاتر لەناوبەین هێزەیل پێشمەرگە و سوپای عراق، و دووپاتکرد ک ئەنجامەگانی کەفنە بتەوکردن ئەمن وئارامی لە ناوچەگە.