شەفەق نیوز/ لە تاوان ئەڵاجەوییگ، سێ کەس لە پارێزگای دهۆک،  گەنجیگ لەناو ری وسانن، وهەردوگ گووشی بڕین. 

موقەدەم هێمن سلێمان وەرپرس راگەیانن فەرمانگەی پۆلیس دهۆک ئەرا ئاژانس شەفەق نیوز وت: سێ گەنج هەردوگ گووش گەنجیگ ١٨ ساڵان لە کامپ  شاریا ئەرا ئاوارەیل ئەیزیدی لە باشوور پارێزگای دهۆک بڕین. 

سلێمان وتیش: هیمان لێکۆڵینەوە ئەرا رەسین وە بندروس رویداوەگە وەردەامە، وتیش: تا ئیسە هووکارەیل ئی تاوانە نادیارە. 

لەلای خوەییش، وەجدی، ئەو گەنجە ک ئیسە لەناو یەکیگ لە خەسخانەیل دهۆک خەفتیە، ئەرا ئاژانس شەفەق نیوز وت: وەرجە دوو رووژ مەوقەی گلەوخواردنم ئەرا کامپەگە، نزیک ساعەت یەک دویای نیمەشەو، لەبان ریەگە وەناکاو کەسیگ شەقیگ لەلیم وەشان و کەفتمە دووڵ بویچگیگ لەناوبەین کامپەگە وکۆمەڵگەی شاریا.   

وەجدی وتیش: دویای ئەوە دەس لە گشت شوینیگ لە لەشم وەشانن، وئەوان سێ کەس بوین وشیوەیان نەناسیم. 

گەنجەگە وتیش: سەرم نانە بان زەوی وهەردوگ گووشم بڕین، ولە هووش خوەم چگم، تا خوەم لە خەسەخانە دیم.