شەفەق نیوز/ نێچیروان بارزانی سەرۆک هەرێم کوردستان، ئمڕوو پەنجشەممە، بەیاننامەیگ وە یاد ئەنفال بەهدینان دەرکرد، داوا لە حکومەت فیدراڵی کرد وەزوی قەرەبوو قوربانیەیل بکەێد.

لە بەیاننامەگە ک رەسیە ئاژانس شەفەق نیوز وت: ئمڕوو سی و چوارەمین ساڵیاد ئەنفال بەهدینان کەیمن ک لە دویاترین قۆناغ ئۆپراسیۆنەیل ئەنفال بوی وەتاوان سوپای عراق ئەو سەردەمە لەبان پیکاتەیل هەمەڕەنگ لە خەڵک بەهدینان، ک لە ٢٥ ئاب تا ٦ ئەیلوول ١٩٨٨ وەردەوام بوی.

وتیش: لەی یادە سەر ریز و نەوازش ئەرا ئەو گیانەیل پاک شەهیدەیلە چەمنیمن، و ریز لە یادیان گریمن، وسڵاو لە خیزان وکەسوکاریان کەیمن.

دیاری کرد ک تاوان ئەنفال ک هەرلە گەرمیان دەسوەپی کرد تا رەسیە دویاترین قۆناغی لە بەهدینان، ١٨٢ هەزار هاووڵاتی بیگوناه لە خەڵک کوردستان بوینە قوربانی وشەهید بوین، ک وەو جویرەگ دادگای عراقی باڵا جویر تاوان جینۆساید و تاوان جەنگ وتاوان دژوە مرۆیی دادەی قەڵەم.

بارزانی داوا لە حکومەت فیدراڵی کرد وەزوی قەربوو قوربانیەیل بکەێد، وتیش: لە هەرێم کوردستان بایەتە خزمەت زیاتر ئەرا کەسوکارەیل قوربانیەیل پیشکەش بکریەێد وەگەرد بەڵگەکردن ئەو تاوانە، و گشت تەقەلایگ بیریەێد ئەرا بڕیاردانی جویر تاوان جینۆساید لە ئاست جەهان.

وتیش: لەی ساڵیادە، جەخت لەبان یەکڕزی لایەنەیل سیاسی و پیکاتەیل هەرێم کوردستان کەیمن، ک تەنیا مسۆگەرکردنیگە ئەرا مقەیەتیکردن مافەیل دەستووری و دەسکەفتەیل هەرێم کوردستان و دویارووژیگ خاستر ئەرا نەوەیل هاتگ، وهەمیش ئەوەسا نوای دووارەبوین ئەو تاوانەیلە گرێد ک وە درویژی میژوو لەبان گشت پیکاتەیل و خاک وئاو و ئاسمان و سروشت و ژینگەی هەرێم کوردستان جیوەجی کریا.

سەرۆک هەرێم کوردستان لە کۆتایی قسەیلی وت: دروود ئەرا یاد شەهیدەیل، و سوپاس و ڕێز ئەرا مەردی خەڵک هەولێر وبەحرەکە و دەورگردی ک هەڵسیان ئەرا دەسمیەتی کەلەمەدیەیل لە خەڵک بەهدینان لە کۆمەڵگەی (جیزنیکان) و دەسمیەتییان دان، قەت خانەدانی ومرۆییان لە هویر نیەچوود.