شەفەق نیوز/ جینین بلاسخارت سەرۆک شاند نەتەوە یەکگرتگەیل لە عراق، ئمڕوو سێشەممە، راگەیان ک شاندەگە توانای کارکردن ئەرا دروسکردن ناوچەی قەیەغەی ئاسمانی لە عراق نەیرێد تا نوای گورزەیل تورکیا و ئیران بگرێد.
ئەوەیش لە میوانیکردنی لە پەراویز دەسکردن وە دیدار میری لەباوەت خوەرهەڵات ناوڕاس لە شار هەولێر پایتەخت هەرێم کوردستان هات.
دیدارەگە وەناونشان (عراق ئەرا گشتی) یە ک بڕیارە بڕیگ لە کەسایەتیەیل حکومەتی و حزبی لە عراق و جەهان لەناوی بەشدار بوون.
دیدارەگە باس بڕیگ باوەت لەناوی کریەێد جویر ئەو سەختیەیلە لەڕوی حکومەت نوو عراق و گرفتەیل ناوبەین هەولێر و بەغدا.
بلاسخارت لە میوانیکردنی لە دیدارەگە وت: وەرجە هەفتەیگ گفتوگۆ وەرد سەرکردەیل کورد کریا لەباوەت پەلامارەیل تورکیا و ئیران لەبان هەرێم کوردستان و عراق، و داوای چارەسەی ئی گرفتە لەلیم کردن، وتیش: ئی توانا نەیرم باوجی ئەوەگ لە توانا هەس خوەی پاڵپشتیکردن ئیوەس، و بایەتە لەناوەو وەهاز بویمن و یە فرە گرنگە تا لایەنەیل دەرەکی بەجەرمان نەکەن.
وتیش: نیەتوەنیمن ناوچەیگ قەیەغەی ئاسمانی دروس بکەیمن، باوجی بایەتە حکومەت هەرێم کوردستان و حکومەت عراق و ئەو لایەنەیل سیاسی یەکەو بگرن تا نوای ئی سەختیەیلە بگرن، و بایەتە گەندەڵییش لەناو بیەن.
لەلای خوەییش، ئەلبروس کوتراشیف باڵیۆز رووسیا لەلای عراق لە وتاریگ لەباوەت رەوشەیل لە هەرێم کوردستان وت: وڵاتەگەی وەدژ ئەو پەلامارەیلەس لەلایەن ئیران یا هەر دەوڵەتی لەبان هەرێم کوردستان، و زوور لەبان گرنگی وسیان ئەو پەلامارەیل مووشکیە لەبان کێلگەیل نەفتی لە هەرێم کوردستان کرد.
لەلای خوەییش، قوباد تاڵەبانی جیگر سەرۆک وەزیرەیل هەرێم کوردستان لە وتاریگ وت: حکومەت هەرێم کوردستان وەشیوەیگ سەرەکی زوور لەبان چاکسازی کەێد، و قەیرانەیل فرەیگ کەفتنە وەر وڵاتەگە لە ساڵەیل گوزەشتە.
تاڵەبانی وتیش: تەنیا حزب شیوعی خاوەن ئایدۆلۆژیای دیارییە لە عراق، ئەو حزبەێل وەگورەی ئاڵشبویەیل لە مەیدان سیاسی ڕەفتار کەن.