شەفەق نیوز/ وەبوونەی رووژ جەهانی رویوەرویبوین تونوتیژی دژوە ژن، شمارەیگ لە ژنەیل خاوەن پیشە، پیشانگایگ ئەرا پیشەیل دەسڕەنگینی و خوەراک جویراوجور لە قەزای کەلار سەروە ئیدارەی ناوچەی گەرمیان لە هەرێم کوردستان سازین.

پەیامنێر ئاژانس شەفەق نيوز وت: پیشانگاگە پەیوەندی وە رووژ  جەهانی رویوەرویبوین تونوتیژی دژوە ژن (٢٥ تەشرین دویەم) دیرێد، باوجی لەوەر واران لەو رووژە خریا ئمڕوو.

پەیامنێرمان وتیش: شمارەیگ لە خانمە پیشەکارەیل لەی پیشانگا بەشداری کردن، ک وە ئامانج دەرخستن توانایل ژن کریاگە.

پیشانگاگە نمایشکردن خوەراک فۆلکلۆری کوردی ڕەسەن، ونمایشکردن بەرهەمیل دەسڕەنگینی ژن هاناوی.

ئی پیشانگا لە وەردەم پارک بازی شار کەلار کریەێد، و تا ماوەی سێ رووژ وەردەوامە،  وە بەشداریکردن یەکێتی ژنەیل کوردستان.