شەفەق نیوز/ شار سنە خوەرهەڵات کوردستان نازناو هەفتەمین پایتەخت کتاو ئیران وەپی دریا، و چەوڕی کرێد دۊیای ئەو نازناوە شارەگە لە رۊی روشنهۊری و کلتوری خوەنستن کتاو زیاتر ئەوزەڵ بکەێد.
سەید ئەنوەر رەشیدی سەرۆک شارەوانی سنە راگەیان، نزیکەی هەفت ساڵە لە سنە کار ئەرا وەدەسهاوردن ئەو نازناوە کریەێد، ئەرا ئەوەگ شاریگ ئەو نازناوە وەربگرێد وەی جۊرە بایەد پەرە وە کلتوور خوەنستن کتاو و ژیرخان کتاوخانە و چاپ کتاو بەێد.
ریورەسم ناسانن سنە وە پایتەخت کتاو لە تاران وەڕێەوچی و شارەوانی سنە وە هاوکاری فەرمانگەی گشتی روشنهۊری و رێنوێنی ئیسلامی و دامەزراگەی کتاوخانەی گشتیی پارێزگای سنە، پڕۆژەی خوەیان ئەرا هەڵوژاردن ئەو شارە جۊر پایتەخت کتاو خستە رۊی.
لە رسسومەگە وەزیر روشنهۊری ئامادە بۊی و سنە وە هەفتەمین پایتەخت کتاو ئیران ناسان.