شه‌فه‌ق نيوز/ نێچيروان بارزانى سه‌رۆك هه‌رێم كوردستان, ئاشكراى ئه‌نجامه‌يل دانيشتنى كرد وه‌ل ئيمانۆيل ماكرۆن سه‌رۆك فره‌نسى له كوشك ئه‌ليزيه له پاريس پايته‌خت فره‌نسا.
بارزانى ئه‌را رووژنامه‌نويسه‌يل وت: دانيشتنه‌گه وه‌ل سه‌رۆك فره‌نسا خاس بويه‌و ئاماژه وه رۆڵ گه‌وراى فره‌نسا و ماكۆرن كرد له كريانه‌وه‌ى سياسى دوياى 16ى ته‌شرين يه‌كه‌م و مه‌سه‌له‌ى راپرسى، ك به‌شدار بويه له خاسه‌وبوين په‌يوه‌نديه‌يل ناونى هه‌ولێر و به‌غدا.
بارزانى ئه‌وه ده‌رخست دوياى وه‌رگرتن سه‌رۆكايه‌تى هه‌رێم داوه‌تنامه‌يگ ئه‌را سه‌ردان فره‌نسا وه‌پى ره‌سيه و باس له‌وه‌يش كرد دانيشتنى وه‌ل ماكرۆن ئيجابى بويه‌و له‌تى باس له په‌يوه‌نديه‌يل دولايه‌نه‌ى سياسى و ئابوورى كرياگه‌و يه‌يش ئاشكرا كرد ك داوه‌تنامه‌يگ ئاراسته‌ى ماكرۆن كردگه ئه‌را سه‌ردان كوردستان له‌وه‌ختيگ ك له ئاينده سه‌ردان عراق ئه‌كا.