عەبدولغەفور ئەرا ئاژانس شەفەق نیوز وت: دەسەیل چەودیاریکردن بازرگانی دەسکردنە چەودیاریکردن بازاڕەیل وەرجە نزیکەی دوو هەفتە لە مانگ رەمەزان، و هویچ ئاڵشتبوینیگ لە نرخەیل وەچەو ماوەی گوزەشتە توومار نەکردن.

پەیامنێر ئاژانس شەفەق نیوز پرسیارێک لە وەڕیەوبەر چەودیاریکردن بازرگانی کرد ک ئایا ئەڕا نرخ گووشت گرانەو بویە؟، ک وت: کەمی ئەو پەسەیلە ک تیەنە ناو هەرێم کوردستان نرخەگە گرانەو کەێد، ک جاران پشت وە هاوردەی پەس لە سوریا بەساویمن، وەلێ یە ماوەیگە سوریا واز لە کلکردن پەس ئەرامان هاوردگە، ئەوەیش لەوەر رەوشەیل خوەی، و هەمیش پشت وە ئیران بەساویمن، و ئیرنگە ئیرانیش هەناردەی پەس ئەرامان نیەکەێد، یەسە ک ئیرنگە لە پەس خوەمان خوەیمن، و نرخەگەی رەسێدە نزیکەی ١٩ هەزار دینار لەبان قەساوەگە، وەگەرد ئەوەیش لە ماوەی وەهار و مانگ رەمەزان داواکردنی فرەس.

 لەباوەت نرخ فاسوڵیا، ک ئەوەیش وەشیوەیگ شیتانە لەی دوو رووژە گرانەو بوی، سۆران دیاری کرد ک جاران نرخ یەک کیسەی فاسوڵیا وە ٦٥ هەزار بوی، و ئیرنگە لەلای بازرگانەیل وە ٨٥ هەزار دینار فرووشنەی، یەسە ک هەر کیسەیگ ٢٠ هەزار دینار چگەسە بان، واتە هەر یەک کێلو فاسوڵیا ئیسە وە ٤٠٠٠ دینار رەسێدە خاوەن دوکانەیل.