پەیامنێر ئاژانس شەفەق نیوز گەردیە ناو جادەی ساڵم ک هەمیشە خەڵک شارەگە و گەشتیارەیل لە جەژنەیل ئەرای چن، هەمیش گووش لە قسەی بەشیگ لە خەڵکەگە گرد.
ئاهەنگیگ جیاوازتر لە جاران
هاووڵاتی سیروان محمدلە قسەیلی ئەرا ئاژانس شەفەق نیوز ئویشێد: سیمایل ئاهەنگ جەماوەری وەشیوەیگ ئاشکرا و جیاواز لە ساڵەیل گوزەشتە دیار دا، هەرچەن حکومەت ئامادەکاری ئەرای نەکردگە.
وتیش: گەل عراقی وە گشتی و خەڵک کوردستان وە تایبەت خوەشی و ئاهەنگ خوازن، چوینکە ئیمە مینەی بڵویزەی ئومیدیگ وە هاتن ساڵ نوو وە گەشبینی و دووسی کەیمن.
خەفەت بخریەێدە کەنار
هاووڵاتی ژێن شبلی خەڵک کەربەلا، ئەرا ئاژانس شەفەق نیوز ئویشێد: گەل چەوەڕی ئیجوور رووژیگ کەێد تا خەفەتەیل بنەێدە کەنار، و ئیمە خەڵک فورات ناوڕاس تیەیمنە سلێمانی و هەولێر و دهۆك تا لە خەفەت ئەو ناوچەیلمانە سووکەو بکەیمن ک ئاسانترین ژیانیگ لەناویان نییە، باوجی ئەوەگ لە کوردستان دوینیمن جی شانازی و گرنگیە و بەشیگ لەی وڵاتە وەی شیوەی گەشە و ئەوزەڵکردن شارستانیە بوود.
شبلی داوا لە سیاسەتمەدارەیل عراق کرد بکەفنە شوین گامەیل سیاسەتمەدارەیل هەرێم کوردستان و گرنگی بیەنە ناوچەیلیان و گەلیان خوەشهاڵ بکەن.
مێز دانوسەنین
هاوڕێ کارزان، ئەرا ئاژانس شەفەق نیوز وت: ئومید دیرم گشتی لەی کوردستانە بنیشنە بان مێز دانوسەنین و گشت گرفتەیل ناوبەین لایەنەیل کورد چارەسەر بکەن، و هەکاتی جاران وە یەک شاند بنیشنە گەرد هیزەیل سیاسی لە بەغداد تا مافەیلمان لە بوودجە و ئەو باوەتەیل مسۆگەر بکەن.
ئاهەنگەیل مەسیحی ئیسلامی
لەباوەت ئامادەکاری جەماوەری ئەرا ئاهەنگ جەژن زایینی و سەر ساڵ، خانمە هاووڵاتی نازەنین محمد ئەرا ئاژانس شەفەق نیوز ئویشێد: خانەوادی کورد وەگەرد گشت ساڵیک لە سەرتای ئاهەنگیان برا مەسیحیەیل وە زایین مەسیح ئامادەکاری کەن وە هەڵڕازانن دار زایینی ک ئومیدەیل ساڵ نوو کریەنە قەیی.
ئویشێدیش: خشتەیگ تایبەت ئەرا ئاهەنگ سەر ساڵ و رووژەیل وەرجە خوەی دیرن، وە سەردان جادەی سالم و مۆڵەیل و شوینە گشتیەیل وەتایبەت کویەی ئەزمەر ک وەگەرد جەژن زایینی چەرمگ پووشیە.
لە سلێمانی
ئیدارەی پڕووژەی "in Slemani" لە بەیاننامەیگ رەسیە ئاژانس شەفەق نیوز وت: فیستواڵ سەر ساڵ، شەو یەکشەممە، وە کەشوهەوای جیاوازیگ دەسوەپی کرد.
وتیش: فیستواڵ سەر ساڵ نوو، هەڵڕازانن جادەی سالم و چەن شوینیگ لە جادەی مەلیک مەحموود و لەبان پیەڵەیل شارگە هاناوی، وەگەرد سازین ئاهەنگەیل گورانی لە شەوەیل ٣٠ و ٣١ و تیمەیل هەڵپەڕکەی کوردی و تیپەیل مۆسیقا و رێکخستن فیستواڵ خوەراک ک لەناوی زیاتر لە ٦٠ کەسایەتی لە خاوەن کاروبار ناوخوەیی و ٤٠ خاوەن چیشتەخانە چشت و خوەراکیان نمایش کەن.
هەمیش بازیەیل جادە جویر تووپان و یانەسیب و دەسنیشان و تاقیکردن زوور و و ئاگربازی و چەن بازیەیلیگتر لەناو فیستواڵەگە کریەێد.
هەمیش چالاکی مناڵیش لەناوی بوود، جویر باڵۆن و وینەکیشان لەبان دەمچەو و بازیەیلیگتر و دیاریەیل پاپا نۆێڵ و سپایدەرمان و پاتمان.
ئیدارەی پڕووژەگە مکیس خەڵک سلێمانی و ئەو ناوچەیل کوردستان کرد لەی فیستواڵ گەپە بەشدار بوون، و ئاهەنگ وە دویاترین ساعەتەیل ئی ساڵە وە خوەشی و شادی بکەن.