شەفەق نیوز/  وەرێەوبەرایەتی ئاساێش سلێمانی، ئمڕوو دووشەممە، راگەیان توومەتباریگ دەسگیرکردنە ک نیشانەیل هاتوچو هەردگ لای جادە ک دوو شارۆچکەی سەر وە پارێزگاگە وەیەکەو بەسێد دزیە.

وەرێەوبەرایەتیەگە لە بەیاننامیگ ک ئاژانس شەفەق نیوز چەوی وەپی کەفتیە راگەیان" زانیاری وەپیمان رەسی لە ری کەسیلیگ لە سۆشیال میدیا، کەسیگ ئەو نیشانە هاتوچویەیلە ک لە کنار ری ناحیەی شۆرش و سەنگاو هەڵواسیانە دزیە، دیاریکرد، " تیمیگ ئەمنی  دروس کریا، و کەسەگە دەسگیرکریا لە دویای کەمتر لە ساعەتیگ لەبان سکالای هاوڵاتیەیل"..

وەپای بەیاننامەگە، توومەتبار (ک،م،ع) دانشتگ ناحیەی شۆرشە سەر وە قەزای چەمچەماڵ، لە لێکۆلینەوەگەی دان وە تاوانەگەی نایە، و وە نیاز بویە تابلۆەیل هاتوچو جویر مادەی ئەلمنیۆم(فافۆن) بفرووشێد"، دیاریکرد ماشینەگەی دەسنریایە وەبانی، وەگەرد ئەو تابلۆیەیلە  هەڵیکەنیە.