شەفەق نیوز/ نێچیروان بارزانی سەرۆک هەرێم کوردستان، ئمڕوو چوارشەممە، وت: سەدان هەزار لە کورد ئێزدی هانە ناو کامپەیل ئاوارەیی، یا وەرەو وڵاتەیلیگتر کووچ کردن لەوەر ئەو پەلامارە ک ریخریاگ داعش لەبان ناوچەیلیان لە قەزای شنگال جیوەجی کرد.
سەرۆک نێچیروان بارزانی لە وتاریگ لە ناحیەی سمێل لە دهۆک وە بوونەی هەشتەمین ساڵیاد ئەو جینۆسایدە ک ئێزدیەیل کەفتنە وەری، وت: هیمان ٣٢٥ هەزار ئێزیدی هانە ناو کامپەیل ئاوارەیی، و ١٠٠ هەزار لەلیان وەرەو دەیشت وڵاتەگە کووچ بردنە.
باس قویلی زیان ئێزدیەیل لە ساڵ ٢٠١٤ کرد دویای داگیرکردن ناوچەی شنگال لەلایەن داعش، وتیش: پەیمان وەخوەمان دایمنە کار ئەرا دەسمیەتی ئێزدیەیل بکەیمن تا رفیایەیلیان ئازاد بکەیمن، و توەنستیمن ٣٥٤٤ رفیای لە چنگ داعش ئازاد بکەیمن. وکار ئەرا رزگاردن ئەوەکان کەیمن.
سەرۆک هەرێم کوردستان هەمیش داوای هاوکاری وەرد نویسینگەی باوەت رفیایەیل ئێزدی لە دهۆک کرد ئەرا کارکردن لە رزگارکردن ئەوانەگ مەننە.
هەمیش باس لە سوپاسی ئەرا خەڵک دهۆک کرد ئەرا ئەو دەسمیەتیەیلە ک لە مەوقەی ئەو قیرانە ک ئێزدیەیل کەفتنە وەری پیشکەشی کردن، و وتیش: سەرۆک مەسعود بارزانی پەیمان وە ئازادکردن شنگال دا، و وە خوین پێشمەرگە پەیمانی وەجی هاورد.
سەرۆک نێچیروان بارزانی هەمیش سوپاس دەوڵەتەیل هاوپەیمان ناودەوڵەتی دژ وە ریخریاگ داعش وە سەرپەرشتیاری ئەمریکا کرد ئەرا دەسمیەتیی لە ئازادکردن شنگال لە چنگ داعش، و لەخود وەختەگە داوا لە ریخریایل ناودەوڵەتی کرد دەسمیەتی لە دووارە ئاوەدانکردن شنگال پیشکەش بکەن، وتیش: دەسمیەتی شنگال ئەرکیگە یاسایی ورەوشتی لەبان کۆمەڵگای ناودەوڵەتی.