شەفەق نیوز/ نێچیروان بارزانی سەرۆک هەرێم کوردستان وت: هەردوگ حکومەت فیدڕاڵی لە بەغداد و هەرێم کوردستان لە هەولێر، لەباوەت ناکۆکیە گیرهاتگەیل ناوبەینیان لە ساڵەیل دریژیگ هەڵەیلیگ کردن، و جەخت کرد لە گرنگی سوودگردن لەو هەڵەیلە و وەرەونووا چگن ئەرا چارەسەرکەردن گرفتەیل و بیناکردن خاسترین دویارووژ ئەرا گشت عراقیەیل.

قسەگەی بارزانی لە دیداریگ وەگەرد تەلەفزیۆن شەرقیە هات، لە سەرتای باس لەو مناڵی خوەیە کرد ک وەشیوەیگ سرووشتی گوزەرانی کرد لەوەر کووچبردنی وەرد فرەی کوردەیل وەرەو ئیران دویای شکست شۆڕش کوردی.

بارزانی ئاماژە کرد ک مەسعود بارزانی سەرکردەی کورد گه‌وراترین کەسایەتی بوی ک لە گەنجیی تا ئیسە لەلی هووکارە بویە، و گەوراترین کاریگەری لە بیناکردن کەسایەتیی سیاسی و خەباتکاریی ئه‌ون داشتیه‌.

سەرۆک هەرێم وتیش؛ لە ساڵ 1975 تا ئیسە کورد باوەڕ دیرێد ک باوەت کوردی بایەدە لە چوارچیوەی عراق رەفتار وەگەرد گرفتەیلی بکریەێد و چارەسەر بکریەێد.

لەباوەت ئەو ناکۆکیەیلە ک هیمان لەناوبەین بەغداد و هەولێر گیر هاتنە، بارزانی وت؛ گیچەڵەگە هالە ئەوە ک چوین هویرەو کریەێد، ک نەبایەد لە بنەمای زوورکاری چارەسەر بکریەن، و دیاری کرد ک عراق جوور یەک خیزانە، و بایەدە تاکەیل خیزانەگە دانیشتنە بان مێز گفتوگۆ تا گشت گرفتەیل چارەسەر بکەن.

هەمیش وت؛ بایەدە لە دەرسەیل گوزەیشتە هووکارە بویمن، ک بەغداد و هەولێر هەڵەیلیگ کردن، و گرنگ ئارامی سیاسی و ئابووری عراقە، ک بایەدە گرفتەیل دیاری بکەیمن، و چارەسەری ئەرایان پەیا بکەیمن.

بارزانی جەخت کرد ک بەغداد و هەولێر یەکیگیان ئەواکە تەواو کەێد، و بایەدە رەسینەوەی هاووڵاتییەیی تەواو بکەیمن، و هاوبەشی راسییگ دروس بکەیمن، و ئاماژە کرد ک گەل عراق شایستەی ژیانیگ خاسترە، و بایەدە گشت پێکهاتەیل وەسیاسییەیل لەبان ئەوە کار بکەن.

وتیش؛ بایەدە گشتی ئی پرسیارە بکەێد؛ هەڵەیل ئیمە لەوه‌گ لە عراق روی دەێد هانە کوو؟، وتیش؛ لە دویاترین سەردانم ئەرا بەغداد پەیامەگەم ئەوە بوی ک ئیمە هەڵە کردیمن و ئیوەیش هەڵە کردن، بیلا بنیشیمن تا ژیانیگ خاستر ئەرا گشتی دروس بکەیمن.

سەرۆک هەرێم دووارەو کرد ک گەل عراق شایستەی ژیانیگ خاسترە لەی ژیانییە، ک بایەدە مینەی ئەو رییەیلە بکریەێد ک گەشە وە ئابووری تێارن و لە ململانە و مرافەیل بیسوود دویرە بکەفیەێد تا بڕوایی مەردمەگە وە سیاسییەیل و کار سیاسی باریەێدەو.

بارزانی وتیش؛ ئەوەسا عراق وە ری ئاڵشتکردن چوود ک نەوە نووەگە رازی ودروشمە کۆنەیلە نێەوود و کار ئەرا ئاڵشتکردن ئی رەوشە کەێد.

دەربارەی کووچبەرەیل و ئاوارەیل لە هەرێم کوردستان، بارزانی وت؛ نێخوازم ئی باوەته‌ جوور مننەتیگ باس بکەم، ک ئەیە ئەرک خوەمانە، هەنای ئاوارەیل وە کوردستان پەنا بردن پێشوازیکردنیان بیه‌ ئەرک خوەمان ، و دیاری کرد ک هەرێم کوردستان نزیکەی دوو مەلیۆن ئاوارەی عراقی و سوری وەرگرد.

دەربارەی ئەو ئاوەدانییە ک هەرێم کوردستان وەخوەی دی، بارزانی وت: دووارە ئاوەدانکردنەگە لە ساڵ 2004 دەس وەپیکرد هەنای زەمینەی دووارە ئاوەدانکردن ئەوەگ جەنگەیل ویرانیان کرد ئامادە بوی، و بەشدار کەرت تایبەت لەی کارە کردیمن و دەور سەرەکییگ لە ئاوەدانکردنەوەی هەرێم داشت.

وتیش؛ هەرێم و عراق وەگشتی گامەیل زویینه‌ و زیاتر ئەرا دووارە ئاوەدانکردنەوە خوازن.