شەفەق نیوز/ نێچیروان بارزانی سەرۆک هەرێم کوردستان، ئمڕوو سێشەممە، وەگەرد شاندیگ ئیرانی وە سەرۆکایەتی پارێزگار ئازەربایجان خوەرئاوا باس پەیوەندیەیل ئابووری وشیوەیل گواستنەوەی بازرگانی ناوبەین هەردوگ لایەن کرد.

ئەوەیش لە پیشوازیکردن نێچیروان بارزانی، نیمەڕو ئمڕوو، لە هەولێر پایتەخت هەرێم کوردستان،  وە محمد سادق موعتەمەدیان پارێزگار ئازەربایجان خوەرئاوا لە ئیران، و شاند یاوەری.

نویسینگەی سەرۆکایەتی هەرێم کوردستان لە بەیاننامیگ رەسیە ئاژانس شەفەق نیوز وت: هەردوگ لایەنەگە باس پەیوەندی ناوبەین هەرێم کوردستان و ئیران، وشیوەیل دابینکردن هاوکاری و هەماهەنگی زیاتر لە پەیوەندیەیل ئابووری و گواستنەوەی بازرگانی ناوبەین هەردوگ لایەنەگە، و وەناوهاتن زیارەتچیەیل و گەشتیارەیل لە ئیران ئەرا عراق وەڕی مەرزەیل هەرێم کوردستان کردن.

شاندە میوانەگە، وەگورەی بەیاننامەگە، دڵخوەشیی وە سەردان هەرێم کوردستان، و دەرفەت دیدار نێچیروان بارزانی نشان دان، ودووپات لە پیشکەشکردن گشت تەقەلا و ئاسانکارییگ کرد ئەرا زیایکردن پەیوەندیەیل ئابووری وبازرگانی.

لەلای خوەییش، بارزانی رووشنایی خستە بان پەیوەندیەیل دێرین ناوبەین هەرێم کوردستان و ئیران، لە گشت چینەیل، وگرنگی زیای قایمکردن ئی پەیوەندیەیلە، و دیاری کرد ک نووڕین هەرێم کوردستان لەی باوەتە هالە دروسکردن خاسترین پەیوەندیەیل وهاوکاری وەرد دەوڵەتەیل هاوسا.

لە دیدارەگە، باس لەباوەت رەوشەیل سیاسی لە ناوچەگە وەگشتی وباوەتەیلیگتر کریا، ک لە دیدارەگە پارێزگار هەولێر ئومید خۆشناو، و سەرۆک دیوان سۆران، و قونسوڵ گشتی ئیران لە هەولێر ئامادە بوین.