شەفەق نیوز/ پەیکەر شەهیدەیل کورد فەیلی لە بەغداد، داد لەدەس پشتگووشخستن و خاسەونەکردن کەێد، و گەناڵخە لە نزیکی فڕە دریایە، لەسای داناینی لەناو باخچەیگ گشتی، نەگ لە شوینیگ جیا ئەرا مقەیەتیکردنی.

کامیرای ئاژانس شەفەق نیوز ئەو رەوش پەیکەر ئیسە لەناو یەکیگ لە باخچەیل ناوچەی شارع فەلەستین توومار کرد، ک داد لەدەس پشتگووشخستن کەێد، چ لە ڕوی بانینی، یا لە زەمینەگەی ک دەسکردە زەنگەوداین، وەبی چەودیارییگ ئەرای، وەگەرد شکیان لە سەکوەیل شانی، و کڕەیل نویسین قەی پەیکەرەگە وەکردەوەی کەشوهەوا دیرێد سڕیەێدەو.

نافورەی ئاوەگەی لەکار کەفتیە، و گەناڵخە لەدەوری گردەو بویە، چوینکە کەفتیەسە ناو باخچەیگ، و کەفتیەسە وەر دەسکاری وەبی ئەوە ک بنریەێدە شوینیگ وەجیا هەکاتی ئەو پەیکەرەیل لە بەغدای پایتەخت، وەبی چەودیارییگ یا پاسەوانییگ لە نزیکی.

 "پەیکەر شەهیدەیل کورد فەیلی" لە ناوچەی جادەی فەلەستین دانریا، ک یەکیگە لەو ناوچەیلە ک کوردەیل فەیلی فرەیگ هاناوی.

ئەمینداری بەغدا لە ٣٠/١٢/٢٠١٦ وازکردن ئەو پەیکەرە لە کەرت شارەوانی ناوەند رەسافەی بەغداد راگەیان ئەوەیش وەهاووەختی وەگەرد ساڵیاد لەسێدارەدان سەدام حسێن، ک  ئاهەنگ وازکردن پەیکەرەگە وە ماڵئاوییکردن هێمایی ئەرا شەهیدەیل کورد فەیلی وەڕیەو چگ.