شەفەق نیوز/ سەرۆکایەتی پەرلەمان کوردستان، ئمروو سێشەممە، وت: لەدەسەڵات دادگای فیدراڵی باڵا نییە گشت یاسای نەفت و گاز حکومەت هەرێم کوردستان پۊچەڵ بکەێد، و لە خود وەختەگە ئاشکرا کرد ک حکومەت فیدراڵی لە سەرتای ئی ساڵە تا ئیسە هۊچ پۆلیگ ئەرا هەرێم کل نەکردیە.
هێمن هەورامی ئەندام دەسەی سەرۆکایەتی پەرلەمان کوردستان لەناو بینای پەرلەمان ئەرا رووژنامەوانەیل وت: یە یەکەم جارە دادگای فیدراڵی باڵا یاسایگ پۊچەڵ بکەێد ک دانریاگە، وەگورەی یاسای خوەی دەسەڵات پۊچەڵکردن یاسایگ نەیرێد ک وەتەواوی لە پەرلەمان دەرچگە، بەڵی، توانێد مادەیگ پۊچەڵ بکەێد یا راسیەو بکەێد یا تەوەریگ لە یاساگە بووسنێد، وەلێ پۊچەڵکردن گشتی نە، و دووپات کرد ک پەرلەمان کوردستان رازی وە پۊچەڵکردن یاساگەی نێوود.
وتیش: ئەوەسا حکومەت هەرێم کوردستان وەردەوام بوود لە دانوسەنینی وەگەرد حکومەت وەڕیەوبردن کارەیل ئیسە لەی باوەتە، و هەمیش لەناو بەرنامەیەی زۊکردن لە داناین یاسای نەفت و گاز لە ئەنجومەن نۊنەرەیل عراقە.
هەورامی وتیش: ئەنجومەن دادوەری لە هەرێم کوردستان ئەوەسا وە هاوکاری و هەماهەنگی وەرد ئەنجومەن دادوەری باڵای فیدراڵی وەردەوام بوود ئەرا سووکەوکردن نشانە و ڕەنگدانەوەی بڕیار نادەستووری دادگای فیدراڵی.
ئەندام دەسەی سەرۆکایەتی پەرلەمان کوردستان وتیش: حکومەت عراق -وەداخەو ک یە ئۊشم- لە سەرتای ئی ساڵە تا ئمڕوو یەک دینار لە شایستەیل دەستووری هەرێم کوردستان کل نەکردیە، و ئی کارە بەشیگە لەو زوورەیلە ک تیارنە بان هەرێم کوردستان، و بەشیگە لەو پەلامارە ک پێکاتەی دەستووری هەرێم کەێدە ئامانج، باوجی ئیمە بیئومید نێۊمن و ئەوەسا لە تەقەلامان ئەرا چارەکردن گرفتەیل گیرهاتگ ناوبەین هەولێر و بەغدا وەردەوام بۊمن.