شەفەق نیوز/ وەڕیەوبەر گشتی بازرگانی لە هەرێم کوردستان، ئمڕوو سێشەممە، راگەیان ئەوەسا گشت ئاسانکارییگ ئەرا بازرگانی پیشکەش کریەێد ئەرا زیایکردن جویلەی بازرگانی لە هەرێم کوردستان.
نەوزاد شێخ کامل لە بەیاننامیگ رەسیە ئاژانس شەفەق نیوز وت: هەر لە ئیسەو گشت بازرگانەیل توەنن مووڵەت کارەیلیان لە پارێزگایلیان وەربگرن، وەبی گلەوخواردن ئەرا وەزارەت یا بازرگانی گشتی.
وتیش: دی بازرگانەیل ناچار نیین بچنە هەولێر، و هەر لە پارێزگایلیاک کاریان تەواو بوود، و وەیجویرە جویلەی بازرگانی زیای کەێد.
شێخ کامل وتیش: هەرلە ئیسەو رۆتین بازرگانی لە هەرێم کوردستان لەمەو کەێد، وکار ئەرا کەمەوکردنی زیاتر کەیمن، تا جویلەی بازرگانی زیایەو بوود، و هەڵبەت ئمساڵ نزیکەی ٢٠٠٠ رێککەفتن بازرگانی جیوەجی کریا.
وەڕیەوبەر بازرگانی وتیش: وەگەرد ئەوەیش باج لەبان بڕیگ کاڵا لەی هەفتەیل دویاییە لاوریا، ک هیشت نرخ بەشیگ لە چشتەیل ئەرزانەو بوود.
هەرلیوا، وەزارەت دارایی و ئابووری لە حکومەت هەرێم کوردستان، راگەیان ئەوەسا وە هەماهەنگی وەرد وەزارەت بازرگانی ئاسانکاری ئەرا کەرت پیشەسازی لەلاین باچەیل کەێد.
وەگورەی بەیاننامیگ لە وەزارەت داریی و لە، گردەوبوینیگ هاوبەش وەگەرد وەزارەت بازرگانی و وەڕیەوبەر گشتی گومرگ ئەنجام دریا، ئەرا باسکردن لە رەوشەیل کارخانەیل وگرفتیان لەلای باج و رسوومەیل.
وەگورەی بەیاننامەگە، لە گردەوبوینەگە باس گرفتەیل کارخانەیل لە هەرێم کوردستان لەلایەن باج و رسوومەیل کریا، ک ریگری خستە توی کاریان، و بڕیار دریا دەسەیگ هاوبەش دروس بکریەێد، تا ئەو گرفتەیلە لەلایەن ئەو دەسە چارە بکریەێد ک تەگبیرە دروس بوود.