کۆمپانیاگە لە بەیاننامەیگ کە لە ماڵپەڕ فەرمیی خوەی بڵاوی کرد باس ئەوە کرد کە لافاوەگە لە ئەنجام واران رفتیگ بویە کە وەکورد تاویان وەفر لە تورکیای هاوسا لە نیمەی کۆتایی مانگ ئازار بویە.  یەیش هیشتیە کە DNO وەخاتر بیوەیی کێڵگەی تاوکێ وە شیوەیگ وەختانە بوەسێد و لە خود وەختیش کارەیلی بی بڕیان لە کێڵگەی فیشخابور کە کەمتر کەفتیەسە وەری، کە کەفێدە چوارچیوەی مووڵەت تاوکێ.

بڕ بەرهە مووڵەت لە رووژیگ زیاتر لە ٨٠ هەزار بەرمیل داوەزیاس و وە گشتی ٦٥ هەزار بەرمیل لە ماوەی ١٠ رووژ دازەزیاس بەڵام لە ٣٠ ئازار ٢٠٢٤ ئەرا ئاست وەرجە لافاو گلەو خوارد، چوینکە کۆمپانیای DNO کار کەێد ئەرت کەمکردن زیان لافاو و خاسەوکردنی و دانان ئامرازەيل بارکردنی وە بارهەڵگر زیايە.

وەگورەی بەیاننامەگە، لەوەر کەمی نەفت خاو قورس لە بازاڕەیل هەرێم، کۆمپانیای دی ئێن ئۆ دانوسەنین وەرد بسینەیل کرد ئەرا بەرزکردن نرخ تاوکێ/فیشخابور ئەرا ئاست مامناوەندی 30 دۆلار ئەرا هەر بەرمیلیگ.

بەش DNO لە فرووشتن وەردەوامە لە پیدان ڕاستەوخۆ ئەرا کۆمپانیاگە وەرجە بارکردن، و وە گشتی مانگانە زیاتر لە ٢٥ ملیۆن دۆلار بوود لە ساڵ ٢٠٢٤. کۆمپانیاگە دووپات کردگە کە هویچ کارمەنیگ DNO زیان وەپی نەڕەسیە، هەرچەن چەن پارچە ئامێریگ گەورە کە کیشیان چەن تەنیگ بویە لافاو بردەیان  و تا ئیسە شوینیان پەیا نەکریاس.

وەگورەی بەیاننامەی کۆمپانیاگە، وەزەوی کار خاسەوکردن و کار مەیدانی ترەک لە تاوکێ و فیشخابور دەسوەپی کرد، دەسەی وەڕێوەبەر کۆمپانیاگە ڕەزامەنی دان ئەرا پلاندانان بەرهەمهاوردن نوو بۆ مقیتیکردن و ئیجا دەسکردن وە بەرزکردن بەرهەم.

لە شوینەیل ترەک هەرێم کوردستان، کۆمپانیای DNO لە 21 شوبات 2024 وە نووترین بیر (B-3) لە مووڵەت بەعشیقە (DNO 64%) دەس وە چاڵکەنین کردەگە، قویلایی بیرەگە رەسیە 1850 مەتر، واتە نزیکەی نیمەی قوویایی ئامانجەگە.