شەفەق نیوز/ خەڵک ناحیەی مەنەلی، ئمڕوو سێشەممە، داوای زنیکردن کەلاوە و بینا چووڵەیل کردن، ک دویای جەنگ و ئاڵشتکردن دیموگرافی پشتگووش خریانە، و تا بوونە دامودەزگایل حکومەتی و کۆمەڵی.
چالاکوان مەدەنی عومەر عادل ئەرا ئاژانس شەفەق نیوز وت: لە ناحیەی مەنەلی نزیکەی ٧ تا ٨ بینای چووڵکریاگ هەس وەرجە جەنگ عراق و ئیران دروس کریانە، و ئامادە کریانە بوونە دامودەزگایل حکومەتی و کۆمەڵی.
دیاری کرد ک دیارتریان بینای بەش ناوخوەیی خوەنەوارەیل سەرەتایی و ناوەندی لە خەڵک ئاوایەیل ک لە دویادویای هەفتایل سەدەی گوزەشتە بینا کریان، باوجی جەنگ عراق و ئیران و ئاڵشتکردن دیموگرافی هیشت شمارەی دانیشتگەیل کەمەو بوون، لەوەر بارکردن ناوخوەیی ئمجا ئەو بینایلە پشتگووش خریانە، و سیمایلیان تمیایە.
عادل وتیش: بینای بەش ناوەخوەیی ئامادە کریاگە تا بوودە وەڕێەوبەرایەتی پەروەردەی ناحیەی مەنەلی و قەزانیە ک دانیشتگەیلیان زیان لە مەینەتی سەردان فەرمانگە دیرن و هەمیش خەرج قورس ئەو سەردانەیلە ئەرا وەڕێەوبەرایەتی پەروەردەی بلدروز.
وتیش: بینایل مەنەلی سەروەتیگە لەلایەن حکومەتەیل پشتاوپشت پشتگووش خریانە وەگەرد پشتگووشخستن و پەراویزکردن شار نەهامەتدی مەنەلی وە درویژی ساڵەیل.
ناحیەی مەنەلی لەوەخت رمیان ڕژیم وەرین لە ساڵ ٢٠٠٣ تا ئیسە داد لەدەس پشتگووشخستن حکومەتی و خزمەتگوزاری و وەردەوامی کارەیل ئاڵشتکردن دیموگرافی وەخوەی دوینێد، لەناو داوایلیگ وە گلەوداینی ئەرا قەزایگ هەکاتی جارانی لە ساڵ ١٩٨٧.