شەفەق نیوز/ راپۆرتیگ لەلایەن دەسەی لێکۆڵینەوە دەربارەی ئەو گورزە ک کەفتە بان شار هەولێر پایتەخت هەرێم کوردستان ئاشکرای ئەوە کرد ک هویچ بەڵگەیگ لە هەسی بارەگایلیگ ئیسرائیلی نییە. 

وەگورەی ئەو راپۆرتە ک چاپیگی کەفتە دەس ئاژانس شەفەق نیوز؛ دەسەگە هویچ بەڵگەیگ یا چشتیگ گومان لەلی بوود لەو شوینە ک کەفتە وەر گورزەگە پەیا نەکرد.  

راپۆرتەگە دیاری کرد ک دەسەگە هویچ چشتیگ نەدیەسەو  ئەوە پچەسپنێد ک ئەو ماڵەگ کەفتە وەر گورزەگە چالاکییگ سیاسی لەناوی بویە.  

راپۆرتەگە ئەو گورزە ک هەولێر کەفتە وەری، وە پێشێلکردن لەبان بنەما و یاسایل ناودەوڵەتی وە قەڵەم دا.   

لەوەخت دیریگ شەو ١٢ی ئادار گوزەشتە،  هەولێر پایتەخت هەرێم کوردستان، کەفتە وەر پەلاماریگ وە ١٢ مووشەک پالیستی، لە دەیشت سنوور عراق وەشیانە، و کەفتنە دەورگرد قونسڵیەی ئەمریکا و ویستگەی کوردستان ٢٤ لە سەیرانگای سەڵاحەدین، ک بویە هووکار زەرەدەیلیگ دارایی لە بینا و ماڵەیل.