سەلام عەبدولڵا وەرپرس دەسەی هەرەوەزی لە خانەقین، ک دەسەیگ مەدەنیە کار دەسمیەتی نەدارەیل و ئاوەدانکردن و مقیەتیکردن ژینگە کەێد لەناو شار خانەقین، ئمڕوو بانگەواز ئەرا وسیاینگ پشتگیری ئەرا دراوردن کارت نیشتمانی شەش مناڵ کورد فەیلی وەگەرد  داڵگیان کرد.

دەسەگە لە بانگوازەگەی وت: 

بەڕێز سەرۆک وەزیرەیل محمد شیاع سودانی

بەڕێز پارێزگار دیالە موسەنا تمیمی

بەڕێز قایمقام قەزای خانەقین دلێر سایە

هەرچەن رژیم تاوانی بەعس رمیا، باوجی ژیان کوردەیل فەیلی هیمان وەردەوامە، ک ئەو چینە کەفێدە بەددترین رەفتار نامرۆیی لە میژوو.

ئیمە داوا لە گشتی کەیمن، سوو چوارشەممە، ساعەت 10ی شەوەکی، لە وەردەم بینای قایمقامیەت شارەگە گردەو بوون، وەداوای رەدکردن لە بیروکراتی و رۆتین، و دەرکردن کارت نیشتمانی ئەرا شەش مناڵ و داڵگیان لە خانەوادەی رەحمەتی (حشمەت) و ئەوانەگ جویر خوەیانن لە خانەوادەیل بیبەش و ستەمدیدە لە گشت وڵاتەگە.