شه‌فه‌ق نيوز/ ئه‌نجومه‌ن وه‌زيره‌يل هه‌رێم كوردستان، دانيشتنيگ ئاسايى وه سه‌رۆكايه‌تى مه‌سرور بارزانى سه‌رۆك ئه‌نجومه‌ن وه‌زيره‌يل و وه ئاماده‌بوين قوباد تاڵه‌بانى جيگرى سازكرد.
له سه‌ره‌تاى دانيشتنگه سه‌رۆك ئه‌نجومه‌ن وه‌زيره‌يل باس له پرووسه‌ى كوشتن ئه‌بو به‌كر به‌غدادى سه‌ركرده‌ى داعش كرد و وت: ئه‌و پرووسه فريه گرنگ بويه، وه‌لێ يه‌يش ماناى كووتاييهاتن تيرۆر نيه‌و هيمان داعش مه‌ترسى فريه‌يگ ديريد له‌بان هاووڵاتيه‌يل له چه‌ن ناوچه‌يگ له عراق و يه‌يش ده‌رخست ك ئه‌فسانه‌ى داعش له‌بان ده‌س هيزه‌يل پێشمه‌رگه ويران كرياو رێ ئه‌را له‌ناوبردن ئه‌و ريكخرياگ خوه‌شكرد له عراق جوور ئه‌وه‌گ له سوريا له‌بان ده‌س كورد راو نريا.
سه‌رۆك وه‌زيره‌يل رووشناييش خسته بان دويايين رويداگه‌يل عراق و باس له‌وه كرد خراوى بارودوخ عراق له به‌رژه‌وه‌ندى هه‌رێم كوردستان و عراق نيه وه‌شيوه‌يگ گشتى.
جى باسه، سه‌رۆك وه‌زيره‌يل جه‌ختيش له خواست هه‌ڵه‌په‌ڵه كرد له‌باره‌ى داناين پرووژه ياسايه‌يليگ خاسسازى و جيگيركردنى تا وه‌ى نزيكه‌يله ره‌وانه‌ى په‌رله‌مان بكريه‌ێد له چوارچيوه‌ى كارنامه‌يل كابينه‌ى نۆيه‌م، بيجگه خستنه‌ڕوێ راپۆرتيگ له‌لايه‌ن رێبه‌ر ئه‌حمه‌د وه‌زير ناوخوه‌يى له‌باره‌ى پلان ته‌وارى مرۆيى ئه‌را وه‌هاناڕه‌سين په‌نابه‌ره‌يل سوورى ك روێ له هه‌رێم كوردستان كردنه‌و هه‌ر وه‌و خاتريشه پيشنيار دامه‌زرانن سه‌ندووقيگ هه‌ميشه‌يى ئه‌را حاڵه‌يل ئنسانى كرياگه له هه‌رێم كوردستان.