شەفەق نیوز/ ئالا تاڵەبانی ئەندام پەرلەمان عراق، ئمڕوو دووشەممە، وت: بوودجەی ٢٠٢١ قەیرانە داراییەگە لەناوبەین بەغداد و هەرێم کوردستان چارەسەر کەێد.
تاڵەبانی ئەرا ئاژانس شەفەق نیوز وت: رێککەفتن و دانووستانەیلیگ لەناوبەین حکومەت بەغداد و حکومەت هەرێم کوردستان هەس ئەرا چارەسەرکەردن قەیرانە داراییەگە، و دووپاتکرد ک بوودجەی ٢٠٢١ رێککەفتنەیلیگ لەناوبەین دوو حکومەتەگە هاناوی و قەیران دارایی لەناوبەینیان نێمینێد.
دەربارەی قەیرانە داراییەگەی ئیسە تاڵەبانی وت: لە ماوەیگەو و دەسەڵاتداران حکومەت عراق دووپاتکردن ک ئەوەسا دەوڵەتەگە چوودە ناو قەیرانەیگ دارایی لەوەر ئەرزانی نرخ نەفت عراقی، عراق دەوڵەت دەوڵەمەنیگە، و مەزەنە کەم ک ٩٣-٩٤ ٪ داهاتەیلی نەفتیە، بەڵکم لە ساڵەیل گوزەیشتە نەتوێتستیمن شوون و داهاتایەیگ نا نەفتی ئەرا پاڵپشتی رەوش ئابووری پەیا بکەیمن.
تاڵەبانی ئاماژە کرد ک نرخ نەفت ومەرجەیل ئۆپبک لەبان هەناردەی نەفت عراق کاریگەری خراویگ لەبان رەوش ئابووری داشتن، ک بویە قەیران گەورایگ.
تاڵەبانی هەمیش وت؛ ئەوگ حکومەتەگە خستەی وەردەس لە چارەسەرکەردن قەیرانە ئابووریەگە و نرخ دۆلار، کاریگەری خراویگ لەبان بازاڕەگان و تاک عراقی کەێد.
وتیش؛ چارەسەرییەگان پاڵپشتی و ریکارەیلیگ خوازن بایەد بوی وەرجە ئی قەیرانە بویاتاد، تا کاریگەری لەبان ژیان هاووڵاتییەگان و رەوش ژیان و گوزەرانی خیزان عراقی نەکەێد.