ئەو بان و خوار کردنە لە نرخ دۆلار وەشیوەی بەدیگ هاتە بان نرخ شمەک و کاڵا لە بازاڕەیل شار هەولێر پایتەخت هەرێم کوردستان.
ئەحمەد باڵیسانی ک بازرگانە لە کاڵای خواردەمەنی وە بڕ، ئەرا ئاژانس شەفەق نیوز ئویشێد: نرخ کاڵا و شمەک سەرەکی لە بازاڕەیل کەفتە بەرزەوبوین وەرچەویگ و وەردەوامە لە بازاڕەیل شار هەولێر، ک هەر ٢٠ هەزار دینار یەک هەزار دینار کەفتە بانیان.
دیاری کرد ک ئەو چشتەیلە ک جاران وە ٢٠ هەزار دینار فرووشیان ئیرنگە وە ٢١ هەزار دینار فرووشیەن، و ئەوەگ وە ٤٠ هەزار دینار بوی ئیرنگە بویە ٤٢ هەزار دینار، و یەیش لەبان گشت چشتەیل بازاڕ بوی، و ئی گرانیە وەرجە چەن رووژیگ دەسوەپی کرد.
لەلای خوەییش، یوسف محمد ئەویش بازرگان خواردەمەنیە وە بڕ لە بازاڕەیل هەولێر، ئەرا ئاژانس شەفەق نیوز ئویشێد: چوینکە نرخ دۆلار جیگر نییە، بازاڕەیل گڵووڵە بوینە، و دیاری کرد ک بازرگانەیل بازاڕ بڕ فرووشتن نیەخوازن چشتەیلیان بفرووشن چوینکە رخیان لە زەرەد مەوقەی سەنین و هاوردە چوود، چوینکە نرخەیل ئاڵشت بوین.
وتیش: خەڵکەگە یە چەن رووژیگە فرە خواردەمەنی نیەسینن، چوینکە نرخەیلیان گرانەو بوی، و بازاڕەگە نیمچە وسیاگە لەوەر شیواشیو نرخ دۆلار.
لەلای خوەییش، شێروان تاهیر خاوەن دوکان ئاڵشتکردن پویلە لەناو بۆرسەی هەولێر، ئەرا ئاژانس شەفەق نیوز ئویشێد: ئمڕوو فرەترین رووژە لە شیواشیو نرخ دۆلار، ئەوەیش لەوەر ئەو بڕەیل دولارە ک بانک ناوەندی خستەی بازاڕ .
وتیش: ئەگەر ئی سیاسەتە وەیجویرە وەڕیەو بچوود، نرخ ١٠٠ دۆلار لە ١٦٠ هەزار رەد کەێد، و رخم چوود عراق وەیجویرە بوود.