شەفەق نیوز/ پەیمانگای جاکسون ئەرا باوەتە ناودەوڵەتییەکان، دانیشتنیگ ئەرا باسکردن لە رەوشەیل کورد لە خوەرهەڵات ناوڕاس ئەنجام دا، وەبەشداریکردن دیبلۆماسیەیلیگ دێرین ونوێنەرەیلیگ فەرمی لە کورد لە ئەمریکا.
ماڵبەڕ ( یال دەیلی نیوز) سەروە زانکۆی یال ئەمریکی لە راپۆرتیگ ئاژانس شەفەق نیوز وەرگێڕانی کرد وت: پەیمانگای جاکسون دانیشتنیگ باسکردن لە ری پروگرام زووم ئەنجام دا، ولە ژیر ناونشان (کورد لە خوەرهەڵات ناوڕاس) بوی، و چوار دانیشتن گفتوگۆ لەناوی بوی.
تۆێژینەوەکار ناودار روی ستیوڕات باسەگە وەڕیەو برد، وە بەشداری بەیان سامی عەبدولرەحمان نوێنەر هەرێم کوردستان لە ئەمریکا، و سینام محمد نوێنەر ئەنجومەن سوریای دیموکرات، و باس باوەتەیل کورد لە باکوور خوەرهەڵات سوریا کرد، وگرنگیەیل حکومەت هەرێم کوردستان، و خەبات کوردی ئەرا حکم زاتی لە سوریا، وپەیوەندیەیل ناونی کورد و هاوسەیلیان لە ناوچەگە.
وەگورەی ماڵپەڕەگە، باسکردنەگە لە نوای هەر تاکیگ لە کۆمەڵگای زانکۆی یال واز بوی.
سینام محمد وت: باوەت کورد یەکیگ لە گرنگترین باوەتەیل و ئاڵوزترینە لە خوەرهەڵات ناوڕاس، ک کورد لە چوار ناوچە جیگرە، لە سای حکومەتەیلیگ جووراجور لە تورکیا و عراق و ئیران و سوریا.
وتیش: هەڵبەت ئیمە خوەشبەختیمن ک هەرێم کوردستان فەرمی لە عرزق دیریمن، لە وەختیگ وەداخەو ئەو ناوچە کوردیەگان لەو دەوڵەتەیل تر وەفەرمی نەچەسپیانە.
سینام محمد وە باس ئەو رەوشە ک کورد لە سوریا وەخوەیان دوینن دەسکردە باسەگە، ک باس ناوچەیل ئیدارەی سەروەخوەییان ک وە رۆج ئاڤا ناسریاگە کرد، و نزیکەی دوو مەلیۆن کورد هانە رۆج ئاڤا، و خوەیان لە پێکهاتەیل رەسەن ئەو ناوچەن.
و باس سێ باوەت گرنگ کرد ک ئیسە هانە نوای کورد لە سوریا: جیماگەیل ئایدۆلۆژیای داعش، و کۆنتڕۆڵکردن تورکیا لەبان بەشەیلیگ لە باکوور سوریا، و هاتن ئاوارەیل لەو ناوچەیلە ک تورکەکان کۆنتڕۆڵیان کردنە.
ستیوڕات، وەڕیەوبەر دانیشتنەگە، باسەگە وەرەو کورد عراق لە هەرێم کوردستان برد.
بەیان عەبدولرەحمان وت: کورد لە هەرێم هانە نوای چەن گرفتیگ، و هەمیش هانە نوای قەیرانیگ مرۆیی پەویەندی وە ئاوارەیل دیرێد، ک هیمان نزیکەی یەک مەلیۆن ئاوارە لە سوریا و ئەو ناوچیل عراق هانە هەرێم، هەرچەن ئەو شمارە دەسکردە کەمەوبوین، وەلێ هیمان شمارەی گرنگیگە ئەرا ناوچەگە ک تەنیا پەنج مەلیۆن کەس هالە ناوی.
وتیش؛ کاریگەری کۆڤید ١٩ فرە خراو بوی، و فرە لە رێکخراوە ناودەوڵەتیەکان و رێخراوەیل کۆمەڵگای مەدەنی توانای وەردەوامی لە پێشکەشکردن خزمەت و دەسمیەتی ئەرا ئاوارایل نەیاشتن.
عەبدولرەحمان نشان دا ک فرە لەی ئاوارەیلە توانای گلەوخواردن ئەرا ماڵەیلیان لە عراق نەیرن لەوەر ئەو میلیشیایلە ک وەرجەیە دژوە داعش جەنگین، و ئیسە بوینەسە هووکار شیوانن ئارامی ناوچەگە، وهەمیش ئاوارە سوریەکان لە سوریا توانای گلەوخواردن نەیرن چوینکە ململانەگە وەردەوامە و هیلد دویارووژیان نادیار بوود.
و هەرێم کوردستان کەفێدە وەر قەیرانیگ دارایی و ئی پەتایشە فرەیەو کرد، و بیان خان وتیش: کاریگری پەتاگە وەیرانکەر بوی لەبان ئابووریمان، ک لە ساڵ گوزەیشتە نرخەیل نەفت داوەزیان، و ئەوەیش جەخت فرەیگ لەبانمان داشت، وەگەرد ئەوەیش، پارەکە، حکومەت بەغداد تەنیا نیمەی شایستە داراییەیل ئەرا هەرێم کوردستان کل کرد، ک بویە هووکار شکست گەورەیگ.
ئیجا سینام محمد باس دویاڕووژ کورد لە رۆج ئاڤا کرد، و وە شیوەیگ تایبەت دەربارەی دویاڕووژ پەیوەندیەیل وەگەرد رژیم بەشار ئەسەد، ورەخنەی حکومەت سوریا کرد چوینکە لە کفتوگۆەیل ئاشتی لە جنێڤ و لە دەسەی دەستوری ئیدارەی سەروەخوەیی دویرەو خست، و نشان دا ک گفتوگۆەیل ئاشتی لە سوریا وەبی بەشداریکردن ئیدارەی سەروەخوەیی نێڕەسێدە ئەنجام.
محمد دیاری کرد ک ئیدارەی سەروەخوەیی تەقەلا دا وە راستەخۆ بچوودە ناو حکومەت ئەسەد، باوجی رژیم سوری هیمان مەغز کۆنتڕۆڵکردن گشت سوریا دیرێد، هەکاتی ساڵ ٢٠١١.
و نشان دا ک فرە چشت لەماوەی دە ساڵ لە سەردەمەگە ئاڵشت بوی، و مەردمەگە لە ناوچەی باکوور سوریا دی خوەشیان لە گلەوخواردن ئەرا حکومڕانی ئەسەد نیەتیەێد، و وتیش: مەردمەگە وەی ئازادییە فرە خوەشحاڵن، وە یەکسانی لەناونی ژن و پیاو، و ئازادی ئایینی.
ستیوڕات باس ئەو دەورە کرد ک تورکیا لە عراق و سوریا رانێد، وپرسیار کرد ک ئەگەر سەرۆک رەجەب تەیب ئۆردوگان، وەخاتر سەرکەفتنی لە هەڵبژاردن ٢٠٢٣ شایەت هەڵوێستە سەختەگەی وەرانوەر کورد لە تورکیا ئاڵشت بکەێد، و بکەێدەی هەڵوێست پاڵپشتی، و دیاری کرد ک خوازین سەرکەفنتی هیلێدەی فرەتر بکەفێدە گەرد کورد.
باوجی سینام محمەد ئەو هەڵوێستە لەلاین ئۆردوگان وەدویر زانست، و نشان دا ک تورکەیل هیمان کۆنتڕۆڵ عەفرین کردنە و پێشیلکاری لەبان ماف مرۆڤ دژوە کردن کەن و قەیەغەی ئازادی ئایینی کەن.
وتیش: ئیمە ئامادەیمن وەخاتر ئەنجامدان گفتوگۆ وەگەرد تورکیا ئەرا یەکلاکردنەوەی گشت گرفتەیل، باوجی ئەوان هیمان بمباران شارەیل لە سوریا کەن.
و بڕیارە پەیمانگای جاکسون لە چوار ئایار ئایندە دویاترین دانیشتنی لەی باسە ئەنجام بیەێد.