شەفەق نیوز/ مەسرور بارزانی سەرۆک حکومەت هەرێم کوردستان، ئمڕوو سێشەممە، لە لەندەن، وەگەرد بۆریس جۆنسۆن سەرۆک وەزیرەیل بەریتانیا، باس دویاترین گەشەیل و نووەوبویەیل لە عراق و ناوچەگە کردن، وەگەرد باسکردنیان لەباوەت پەیوەندیەیل ناوبەین هەرێم کوردستان و بەریتانیا.    

حکومەت هەرێم کوردستان لە بەیاننامیگ رەسیە ئاژانس شەفەق نیوز وت: سەرۆک وەزیرەیل بەریتانیا باس بنەمایل برادەری و پەیوەندیەیل میژووی کرد ک بەریتانیا وەگەرد هەرێم کوردستان گریە دەن، و باس سەردانەگەی ئەرا هەرێم کوردستان،  و وەیەکیگ لەو سەردانەیلە باسی کرد ک قەت لەهویر نیەچوود، و هەمیش باس لە ئومید خوەی کرد ک دەرفەتیگ ئەرا جاریگتر سەردان هەولێر ئەرای پەیا بوود.    

بەیاننامەگە وتیش: سەرۆک وەزیرەیل بەریتانیا دووارەی ئامادەبوین وڵاتەگەی ئەرا دەسمیەتیداین هەرێم کوردستان لە گشت چینەیل کرد، هەمیش پشتگیری خوەی نشان دا ئەرا چارەکردن گرفتەیل ناوبەین هەرێم کوردستان و حکومەت فیدراڵی لەبنەمای دەستوور.   

جۆنسۆن هەمیش دەسخوەشی لە هەماهەنگی و هاوکاری و ئەو رۆڵ خاسە ئەرا سەرۆک حکومەت هەرێم کوردستان کرد لەباوەت چارسەرکردن باوەت کووچبەرەیل. 

بەیاننامەگە وتیش: سەۆک حکومەت هەرێم کوردستان سوپاس لە بەریتانیا و هاوپەیمان ناودەوڵەتی کرد ئەرا هاوکاری وەردەوامیان وەگەرد هەرێم کوردستان،  و پاڵپشتیکردنی لە نواگردن تیرۆر و رخەیل تیرۆریستەیل داعش.  

لەلایگتر لە گردەوبوینەگە، سەرۆک حکومەت هەرێم کوردستان باس ئەو چاکسازییە کرد ک حکومەت هەرێم کوردستان دەسوەپی کردگە ئەرا رەنگاوڕەگکردن ئابووری و سەرچەوەی داهاتەیل و بتەوکردن بەرهەمهاوردن، و باس لە ئومید خوەی کرد ک بەرهەمهاوردن بەریتانیا و لە هەرێم کوردستان زیایەو بوود، ک هەرێمیش گشت شیوەیل ئاسانکاری ئەرا بەرهەمهاورەیل پێشکەش کەێد.