شەفەق نیوز/ فراکسیۆن پارتی دیموکراتی کوردستان، ئمڕوو چوارشەممە، پیشوازی لە رەزامەنی ئەنجومەن وەزیران عراق لەبان رەوانەکردن بەش هەرێم کوردستان لە بوودجەی دارایی ساڵ ٢٠٢١.

پێشەوا هەورامی قسەکەر وەناو فراکسیۆنەگە لە کۆنگرەیگ رۆژنامەوانی ئمڕوو وت: ئەگەر ئی رێککەفتن دویایینە کەفتە ئاست جیوەجیکردن و حکومەت فیدڕاڵی بەش هەرێم کل کرد، ئەوەسا بوودە دەریگ یا کلیلیگ ئەرا گشت ناکۆکیەیل و باوەتە گیرهاتگەیل لەناوبەین هەولێر و بەغداد.

وتیش؛ ئاشکرایە ک ناکۆکیەیل ناوبەین هەولێر و بەغداد تەنیا لەبان بوودجەگە نییە، باوجی باوەتەیلیگ تر هەیە گفتوگۆ و رێککەفتن و چارەسەری خوازن.

هەورامی وتیش: حکومەت فیدڕاڵی پەیمان رەوانەکردن بەش هەرێم لە بوودجەی گشتی وە زویترین وەخت دا، و ئومید خوازیمن باوەت مووچەیل بوونە گرنگی لە بەش هەرێم کوردستان.

قسەکەر وەناو فراکسیۆنەگە دووپات کرد ک حکومەت هەرێم کوردستان وە دریژی ئەو ماوەی گوزەیشتە ناچار بوی لە داهاتەیل ناوخۆیی خوەی مووچەی فەرمانبەرەیل بەێد.