شەفەق نیوز/ دوو سەرچەوەی ئەمنی، ئمڕوو پەنجشەممە، خەوەردان لە کوشیان مەدەنییگ وە پەلاماریگ چەکداری لە بەغدای پایتەخت، و کشاوەرزیگ زەخمداربویە وە تەقین بومبیگ لە پارێزگای دیالە.
سەرچەوەیگ لە پۆلیس بەغدا وە ئاژانس شەفەق نیوز وت، چەکدارەیلیگ نەناسریایگ ک ماتۆرسکێڵ وەپیان بویە تەقە لە مەدەنییگ کردنە لە ناوچەی گەرەگ عەدل، لە دویای زەخمداری بوین سەری دەسوەجی گیان لە دەسدا.
سەرەرای ئەوەی وەلایەن مەفرەزەیل سووپا ک نزیک بوینە لە رویداوەگە تەقە لەلیان کریایە باوجی واینە.
سەرچەوە ئەمنیەگە لە دیالە دیاریکرد، کشاوەرزیگ تویش زەخمداری بویە وە تەقین بومبیگ لە دەوروگەرد ناحیەی عەبارە لە خوەرهەڵات بەعقوبە.
سەرچەوەگە وە ئاژانس شەفەق نیوز وت، لە ئەنجام تەقینەوەی بومبەگە لە یەکیگ لە بووسانەیل ئاوای "دوربەین"، کشاوەرزیگ تویش زەخمداری سەختیگ بویە.
وتیش هیزەیل ئەمنی لەشوین رویداوەگە ئامادەبوینە و لێکۆڵینەوە وازکردنە هەڵمەتیگ پاکاوکردن دەسوەپی کردنە.