شەفەق نیوز/ کەشناس عەلی جابر زیادی، ئمڕوو شەممە، مەزەنەکرد ناوچەیل فرەیگ لە عراق دەرفەت واران وارین ناوڕاس تا رفتیگ بیاشتوون، کە پلەی گەرمی وەگەردیا داوەزنێد.
زیادی وە ئاژانس شەفەق نیوز وت، مەزەنەیل دیاریکەن بارستەیگ داوەزیان واراناویگ کەمەکەمە روی لەوڵاتەگە کەێد، یەکەم حاڵەت لە شەو چوارشەممەی ئایندە دەسوەپی کەێد و لە رووژ پەنجشەممە قویلەوبوود، و وە شیوەی جیاوازیگ وەردەوام بوود ئەرا ماوەی 3 رووژ.
وتیش " مەزەنەیل سەرەتایی دیاریکەن بەشەگان باکوور و ناوراس وڵاتەگە واران ناوڕاس تا رفتیگ گرێدی لە ناوچە جیاوازەگانی".
زیادی ئاشکەرایکرد، "لە شارەیل باشوور لە کۆتایی ئەی هەفتە دەرفەت واران وارین هەس، مەزەنەکریەد پلەی گەرمی لە رووژ دووشەممە بەرزەوبوود وە جیاوازی سێ پلە".