شەفەق نیوز/ وە شیوەیگ ناکاوی ئەپلیکەیشن پەیام "واتسئاپ"، ئمڕوو سێشەممە، لە شوینەیلیگ جیاجیا لە عراق پەکی کەفت.

وەکارهاورەیل واتسئاپ لەناو عراق، خەوەردان ک نیەتوەنن گرووپەیل وەکار بارن، و پەیام کلکردن تاکانە ئەرا وەختیگ مەن، تا دویای کەمیگ ئەویش پەکی بکەفێد.

وەکارهاورەیل ئەپلیکەیشنەگە لە گیچەڵیگ لەناوی و وسیان تەواوی لە بڕیگ لە دەوڵەتەیل جەهان هاتنە دەنگ، ک توانای کلکردن و وەرگردن پەیام نویسین ودەنگ و وینە و ڤیدیۆیش نەما.

ئی گیچەڵە دویای یەک رووژ لەوە هات ک واتسئاپ کاری لەبان بڕیگ لە مۆبایلەیل وسان ک وە سیستەم  iOS 10، وiOS 11 کار کەن، ک دی نیەتوەنن ئەبدەیت بکەن.

جی باسە ک یە کەمەن گلە نییە ک واتسئاپ لە جەهان بوسێد، لە وەختیگ کۆمپانیای خاوەنی "میتا' تا مەوقەی نویسین خەوەرەگە هویچ دەنگیگ لەلی نەهاتیە.