ڕێوڕەسمی کۆتایی دەیەمین فێستیڤاڵی فیلمی "دھۆک" Duhok بە ئامادەبوونی دوکتۆر "عه‌لی ته‌ته‌ر" پارێزگاری دهۆک، "ئه‌میرعه‌لی محه‌مه‌دتاهیر" سه‌رۆکی فێستیڤاڵی فیلمی "دھۆک"، "شه‌وکه‌ت ئه‌مین کۆرکی" بەڕێوەبەری هونەریی ئەم فێستیڤاڵە، ئەندامانی دەستەی دادوەرانی به‌شی پێشبڕکێی "سینەمای جیهان" و به‌شی پێشبڕکێی "سینەمای کوردی"، سینەماکارانی ئامادەبوو لەم رووداوه‌ سینه‌ماییه‌ و هۆگرانی هونەری سینەما، ڕۆژی شەمە ١٦ی کانوونی دووەم/ دێسامبری ٢٠٢3 لە هۆڵی "کۆنگرە"ی زانکۆی دهۆک لە شاری دهۆک لە هەرێمی کوردستانی عێراق بەڕێوەچوو که‌ هه‌ڵبژێردراوان و براوەکانی بەشە جۆراوجۆره‌کان ڕاگەیەندرا و ته‌ندیسی زێڕینی "گه‌ڵا مێو" و ته‌ندیسی زیوی "گەڵا مێو"ی فێستیڤاڵ، بڕوانامەی ڕێزلێنان و خەڵاته‌کانی نەغدیی به‌وان پێشکه‌ش کرا. 

"نیزامەدین ئاریچ" چەندین پارچە مۆسیقای کوردیی پێشکەش کرد

لە سەرەتای ئەم رێوڕه‌سمه‌دا، "نیزامەدین ئاریچ" Nizamettin Ariç ئاوازدانەر و گۆرانیبێژی بەناوبانگی کوردی دانیشتووی وڵاتی ئەڵمانیا، به‌ هاوڕێیه‌تی گروپی مۆسیقای دهۆک؛ چەندین پارچە مۆسیقای کوردییان پێشکەش کرد و له‌ درێژه‌دا، خەڵاته‌کانی بەشە جیاوازەکانی پێشبڕکێ بەخشرا. 

لە لایه‌ن ئەندامانی دەستەی دادوه‌رانی بەشی رکابه‌ری "سینەمای جیهان"ی ئەم فێستیڤاڵە، ته‌ندیس، له‌وحه‌ی رێزلێنان و خەڵاتی ١٠ هەزار دۆلاری "یۆڵماز گۆنه‌ی" به‌ باشترین فیلمی سینه‌مایی، خەڵاتی 5 هەزار دۆلاری بۆ باشترین دەرهێنانی فیلمی درێژی سینه‌مایی، خەڵاتی 5 هەزار دۆلاری بۆ باشترین کورتە فیلمی نێو بەده‌وڵه‌تی، خەڵاتی 5 هەزار دۆلاری بۆ به‌هره‌ی نوێ، خەڵاتی 1500 دۆلاریی تایبه‌تی ئەندامانی دەستەی دادوەران بۆ باشترین کورته‌ فیلم و خەڵاتی 5 هەزار دۆلاریی ئه‌نیستیتۆی "گۆته‌"ی ئه‌ڵمانی بۆ باشترین به‌ڵگه‌فیلم پێشکه‌ش ‌کرا. 

بەشی پێشبڕکێی "سینەمای جیهان": 

ئەندامانی دەستەی دادوەرانی به‌شی کێبڕکێی فیلمه‌کانی "سینه‌مایی نێودەوڵەتی" که‌ بریتی بوون لە؛ "ئەمین ئاڵپەر" Emin Alper سه‌رۆکی دەستەی دادوەران، دەرهێنەر و سیناریۆنووس لە وڵاتی تورکیا، "مه‌هسا موحیب عەلی" Mahsa Mohebali ڕۆماننووس و سیناریۆنووس لە وڵاتی ئێران، "نیرماڵ دێهل" Nirmal Dhal ئەکتەر له‌ هیندوستان، "ئارتور زێبۆرسکی" Artur Zaborski ڕۆژنامەنووس له‌ وڵاتی پۆڵەندا و "شەبنەم زەریاب" Chabname Zariab سیناریۆنووس و دەرهێنەری ئەفغانستانی دانیشتووی وڵاتی فەرەنسا، ده‌نگه‌کانی خۆیان به‌م شێوه‌یه‌ راگه‌یاند: 

ـ خەڵاتی "یێلماز گۆنای" Yılmaz Güney به‌ فیلمی سینه‌مایی "لە نێوان دوو شۆڕشدا" Between Revolutions لە دەرهێنانی "ڤلاد پێتری" Vlad Petri لە وڵاتی ڕۆمانیا پێشکه‌ش کرا. 

ـ خەڵاتی بەهرەمەندی نوێ به‌ خاتوو "ملێنا ئابۆیان" Milena Aboyan بۆ دەرهێنانی فیلمی سینه‌مایی "ئیلاهه‌" Elaha لە وڵاتی ئەڵمانیا بەخشرا. 

ـ ڕێزلێنانی تایبەتی دەستەی دادوەران به‌ فیلمی سینه‌مایی "بێ کۆتایی" No end لە دەرهێنانی "نادر ساعی وه‌ر" Nader Saeivar بەرهەمی هاوبەشی ئێران، تورکیا و ئەڵمانیا پێشکه‌ش کرا. 

بەشی پێشبڕکێی "سینەمای کوردی": 

ئەندامانی دەستەی دادوەرانی فیلمە بڵیندەکانی سینه‌مایی بەشی "سینەمای کوردی" که‌ بریتی بوون لە؛ "کامیلا لایمل" Camille Laemel سەرۆکی دەستەی ناوبژیوان و بەرهەمهێنەر لە وڵاتی فەرەنسا، "مەریەم بۆبانی" Maryam Boubani ئەکتەری کورد لە وڵاتی ئێران، "مەحموود ئەبو عەباس" Mahmoud Abu Abbas له‌ وڵاتی عێراق، "نیزامەدین ئاریچ" Nizamettin Ariç ئاوازدانەر و گۆرانیبێژی کورد دانیشتووی وڵاتی ئەڵمانیا و "ئێلسا ڕاسباخ" Elsa Rassbach بەرهەمهێنەر له‌ وڵاتی ئەمریکا، ده‌نگه‌کانی خۆیان به‌م شێوه‌یه‌ راگه‌یاند:  

ـ خەڵاتی باشترین فیلمی ئەم بەشە به‌ فیلمی سینه‌مایی "ئالیهۆپا: چیرۆکی داڵکورد" Allihopa: The Dalkurd Story لە دەرهێنانی "کوردۆ دۆسکی" Kordo Doski بەرهەمهێنانی هاوبەشی وڵاتانی ئەمریکا، کەنەدا، سوید و هەرێمی کوردستان پێشکه‌ش کرا. 

ـ خەڵاتی باشترین دەرهێنان به‌ فیلمی سینه‌مایی "ئه‌لیفی دایک" MOTHER ELIF لە دەرهێنانی "کازم ئۆز" Kazim Öz و "سەمیر ئەسڵان یارک" Semir Aslanyürek لە باکووری کوردستان بەخشرا. 

ـ خەڵاتی باشترین سیناریۆ به‌ خاتوو "عایشە پۆلات" Ayşe Polat بۆ نووسینی سیناریۆی "خاڵی تاریک" In The Blind Spot لە وڵاتی ئەڵمانیا پێشکه‌ش کرا. 

ـ "ئەحمەد محەمەد" لە عێراق بۆ ده‌ورگێڕان لە فیلمی سینه‌مایی "مێسی بەغدا" Baghdad Messi به‌رهه‌می هاوبەشی بەلجیکا، هۆڵەندا و هەرێمی کوردستان خەڵاتی باشترین ئەکتەری پیاوی بەدەستهێنا. 

ـ خاتوو "پەروین ڕەجەبی" له‌ لە ڕۆژهه‌ڵاتی کوردستان، بۆ ده‌ورگێڕان لە فیلمی سینه‌مایی "شادیی تێپه‌ڕیو" Transient Happiness خەڵاتی باشترین ئەکتەری ژنی بەدەستهێنا. 

ـ ڕێزلێنانی تایبەتی دەستەی دادوه‌ران بە خاتوو "شیما مولایی" بۆ ده‌ورگێڕان لە فیلمی سینه‌مایی "بەیان" BEYAN لە ڕۆژهه‌ڵاتی کوردستان بەخشرا. 

بەشی پێشبڕکێی "کورتە فیلم": 

ئەندامانی دەستەی دادوەرانی کورتە فیلمەکانی بەشی رکابه‌ریش که‌ بریتی بوون لە؛ "کارمێن گرای" Carmen Gray سەرۆکی دەستەی ناوبژیوان و ڕۆژنامەنووس له‌ وڵاتی نیووزلەندا، "کامەران بێتاسی" Kamiran Betasi دەرهێنەر لە هەرێمی کوردستان و "سوهه‌یلا شۆنک" Süheyla Schwenk دەرهێنەر لە وڵاتی ئەڵمانیا، ده‌نگه‌کانی خۆیان به‌م شێوه‌یه‌ راگه‌یاند:  

ـ خەڵاتی باشترین فیلمی بەشی نێودەوڵەتی به‌ کورتە فیلمی "یاریی جوامێرانه‌" Fair play لە دەرهێنانی "زوئێل ئێشباخێر" Zoel Aeschbacher بەرهەمی هاوبەشی وڵاتانی سویسرا و فەرەنسا پێشکه‌ش کرا. 

ـ خەڵاتی باشترین فیلمی کوردی به‌ کورتە فیلمی "شتە نەناسراوەکان" Things Unheard of لە دەرهێنانی "ڕەمەزان قلیچ" Ramazan Kılıç لە باکووری کوردستان بەخشرا. 

ـ ڕێزلێنانی تایبەتی دەستەی دادوه‌ران بە خاتوو "ژینۆ هادی حەسەن" بۆ دەرهێنانی کورتە فیلمی "سێگۆشە" TRIANGLE لە هەرێمی کوردستان پێشکه‌ش کرا. 

بەشی پێشبڕکێی "بەڵگەفیلم":

ئەندامانی دەستەی دادوەرانی فیلمەکانی بەشی رکابه‌ریی "به‌ڵگه‌فیلم و دۆکیۆمێنتاری" که‌ بریتی بوون لە؛ "ڕۆدنی چارڵز" Rodney Charles سەرۆکی دەستەی دادوەران، ئەکتەر و بەرهەمهێنەر لە وڵاتی ئینگلتەرا، "ئانایس بۆلێک" Anaïs Boelicke به‌ڕێوه‌به‌ری هونەری لە وڵاتی ئەڵمانیا و "رێکێش شەهباز" Rekesh Shahbaz ئەکتەر و دەرهێنەر له‌ هەرێمی کوردستان، ده‌نگه‌کانی خۆیان به‌م شێوه‌یه‌ راگه‌یاند:  

ـ خەڵاتی باشترین به‌ڵگه‌فیلمی نێودەوڵەتی به‌ به‌ڵگه‌فیلمی بڵیندی "ئاسمان هی منە" The sky is mine لە دەرهێنانی سینه‌ماکاری کورد "ئەیووب ناسری" لە وڵاتی ئیتاڵیا پێشکه‌ش کرا. 

ـ به‌ڵگه‌فیلمی بڵیندی "جوانیی شاراوەی عێراق" Iraq's Invisible Beauty لە دەرهێنانی هاوبه‌شی "سەهیم عومەر خەلیفە" و "یورگن باودتس"Jurgen Buedts  به‌رهه‌می هاوبەشی وڵاتانی بەلجیکا، فەرەنسا و هەرێمی کوردستان، خەڵاتی باشترین فیلمی دیکۆمێنتاریی کوردی بەدەستهێنا.

ـ ڕێزلێنانی تایبەتی دەستەی دادوه‌ران بە به‌ڵگه‌فیلمی "ئێرن" Eren لە دەرهێنانی "ماریا بیندەر" Maria Binder لە وڵاتی تورکیا بەخشرا.

خەڵاتی فیپەرشی: 

ئەندامانی دەستەی دادوەرانی فیدراسیۆنی نێودەوڵەتیی ڕەخنەگرانی فیلم "فیپرێشی" FIPRESCI کە بریتیی بوون لە: "کاترینا دۆکهۆرن" Katharina Dockhorn لە وڵاتی ئەڵمانیا، "ئاینا ڕاندریاناتۆندرۆ" Aina Randrianatoandro لە وڵاتی ماداگاسکار و "سەعید تاراکچی ئۆغڵوو" Sait Tarakcioglu لە وڵاتی تورکیا، ده‌نگی خۆیان به‌م شێوه‌یه‌ راگه‌یاند:  

ـ خەڵاتی "فیپەرشی" FIPRESCI به‌ فیلمی سینه‌مایی "خاڵی تاریک" In The Blind Spot لە دەرهێنانی "عایشە پۆلات" لە وڵاتی ئەڵمانیا Ayşe Polat پێشکه‌ش کرا. 

به‌و سینەماکارانەی که‌ خەڵاتیان بەدەستهێنا پیرۆزبایی ده‌ڵێم

"ئەمیرعەلی محەمەدتاهیر" به‌ڕێوه‌به‌ری فێستیڤاڵی نێودەوڵەتیی فیلمی "دهۆک" ڕایگەیاند: کاره‌کان و بەرهەمەکانی فێستیڤاڵ، دەرئەنجامی یەک ساڵ کاری بەردەوامی هاوکاره‌کانی منه‌؛ سوپاسی هەوڵ، کۆڵنەدان، زه‌حمه‌ته‌کان و ماندووبوونیان دەکەم. به‌ هەموو ئەو سینەماکارانەی که‌ ئەمشەو خەڵاتیان بەدەستهێنا؛ پیرۆزبایی ده‌ڵێم. سوپاسی حکومەتی هەرێمی کوردستان، پارێزگاری دهۆک، ده‌زگاکانی راگه‌یاندن و میدیاکان، زانکۆی دهۆک و هەروەها سپۆنسەرەکانی فێستیڤاڵەکە دەکەم کە هاوکارمان بوون و به‌ پاڵپشتیی دڵسۆزانه‌ی خۆیان، ئێمه‌یان له‌ به‌ڕێوه‌چوونی ئه‌م رووداوه‌ سینه‌ماییه‌ یارمه‌تی داوه‌. 

دەیه‌مین خولی فێستیڤاڵی نێونه‌ته‌وه‌یی فیلمی "دهۆک" Duhok به سه‌رۆکایه‌تی "ئه‌میرعه‌لی محه‌مه‌دتاهیر"، بە دەرهێنانی هونەریی سینه‌ماکاری کورد "شەوکەت ئەمین کورکی"، به دروشمی "زمانی کوردی" و به نمایشی ١١٦ به‌رهه‌م له سینه‌ماکارانی وڵاتانی جۆراوجۆری جیهان لە چوارچێوەی فیلمە بڵیندە سینەماییەکان، کورتە فیلم و بەڵگەفیلمەکان لە چەندین بەشی پێشبڕکێی و دەرەوەی پێشبڕکێی، کۆڕ و کۆبوونه‌وه‌ و پهنێڵی پسپۆڕانه‌ی سینه‌مایی، ڤۆرکشۆپی فێرکاریی ئه‌نستیتۆی "گۆته‌" Goethe-Institut به ناونیشانی چواره‌مین خولی به‌رنامه‌ی "نۆهات" NUHAT و هه‌روه‌ها به پشتیوانی حکومه‌تی هه‌رێمی کوردستان له ڕۆژانی ٩ تا ١٦ی دێسامبه‌ر/ کانوونی یه‌که‌می ٢٠٢٣ لە هۆڵی "کۆنگرە"ی زانکۆی دهۆک، کۆمه‌ڵه‌ی سینه‌مایی "دهۆک مۆڵ" لە شاری دهۆک لە هەرێمی کوردستان به‌ڕێوه‌چوو.