موقتەدا سەدر لەبان تویتەر کە ئاژانس شەفەق نیوز نووڕیەی وت: دویای ئەوەگ سوید دوژمنایەتی خوەی ئەرا ئیسلام و کتاوە ئاسمانییەیل ئاشکرا کرد، یەسە کە ئیسەیش لە کڕەیل دیپلۆماسی و نۆرمە سیاسییەیل رەد کەێد، و وە ریداین ڕەزامەنی دوژمنایەتی خوەی ئەرا عراق راگەینێد، ئەوەیش وە سزانن پەرچەم عراق.

سەدر وتیش؛ "و لەیرەو چەوەڕی وەڵام فەرمی کەم، وەرجە ئەوەگ هەر کاریگ خوەم بگرمەوەر".

سەدر لە قسەیلی وتیش: وەگورەی فامستن من ئەگەر پەرچەم عراق وە کردەوە سزیایە، نەبایەس حکومەت وەتەنیا ئیدانەکردن و شەرمەزارکردن ڕازی بوود، چوینکە ئەوە نشانەس ئەرا لاوازی و بیدەسەڵاتی، و دووارە سزانن قورئان  وە سزانن تەورات و ئینجیل هاوتا نییە، بەڵکم بایەتە گەلەیل جەهان  پشتگیری ئاسمان بکەن، وەنە دەرئەنجامیگ خەیاڵنەکریای تیەێدە سەرمان، و ئیجا وەخت پەشیمانی نیەمینێد.

 دەسەڵاتدارەیل سوید، ئمڕوو پەنجشەممە، بڕیار دا باڵیۆزخانگەی لە بەغدای پایتەخت بوەسن، و خزمەتگوزارییەیل بووسنن، تا ئاگادارییگتر، هەرلیواا بڕیار دریا داوای راویژکار کاروبار عراق بکەن، یەیش دویای ئەوەگ شەفەق ئمڕوو، بینای باڵیۆزخانەی سوید لە بەغدا ئاگری دریا، لەناو خوەینشاندان لایەنگرەیل موقتەدا سەدر ریبەر رەوت سەدر، لە بان ئەوە ک لە گردەوبوینیگ لە سوید لەوەردەم باڵیۆزخانەی عراق، ڕێکخەرەگەی نیاز سزانن چاپیگ لە قورئان داشتیە.