شەفەق نیوز/ سەرچەوەیگ پزشکی، ئمڕوو یەکشەممە، خەوەردا لە مردن ژنیگ دووگیانی وەگەرد مناڵەگەی لەوەر پەتای کۆڕونا لە پارێزگای زیقار، لەوەختیگ ک پارێزگای سەڵاحەدین ١٠ تووشهاتن وە بنچینە نووەگە تۆمار کرد.

سەرچەوەگە ئەرا ئاژانس شەفەق نیوز وت: ژنیگ لە تەمەن ٣٧ ساڵان (دووگیانی) لە مانگ هەشتەمی، وەگەرد مناڵەگەی لەوەر ڤایڕۆس کۆڕۆنا مردن.

سەرچەوەگە ئاماژە کرد ک ئەیە یەکەم چینە وەیجوورە لە پارێزگاگە تۆمار بکریەێد.

لە باوەتەیگ هاوشیوە، پارێزگای سەڵاحەدین، ئمڕوو یەکشەممە، راگەیان تۆمارکردن ١٠ تووشهاتن وە بنچینە نووەگەی ڤایڕۆس کۆڕۆنا.

سەرچەوەیگ پزشکی ئەرا ئاژانس شەفەق نیوز وت: سەڵاحەدین ١٢٠ تووشهاتن وە کۆڕۆنا تۆمار کرد، ١٠ لەلیان لە بنچینە نووەگە بوین.

سەرچەوەگە دووپات کرد ک تووشهاتنەکان وە بنچینە نووەگە لە پارێزگاگە وەیجوورە بەشەوە بوین؛ ٥ لە قەزای شەرقات، و یەک لە دووزخورماتوو و یەک لە تکریت و یەکیگ لە دجێل.