شەفەق نیوز/ ناوەند ماف مرۆڤ، ئمڕوو پەنجشەممە، خەوەردا بەرزترین  حالەت خوەیکوشتن لە ماوەی ساڵ 2021 لە عراق توومارکریا، دیاریکرد لەسەرەتای ئمساڵ 2022 تا ئیسە 700 حالەت توومارکریایە.

 جیگیر سەرۆک ناوەند ستراتیجی ماف مرۆڤ لە عراق، حازم ردێنی، لە لێدوانیگ رەسیە ئاژانس شەفەق نیوز وت: عراق لەماوەی ساڵ گوزەشتە 772 خوەیکوشتن توومارکرد، وە رێژەی دوو خوەیکوشتن لە رووژیگ، دووپاتکرد لەماوەی ئمساڵ تا ئیسە  700 خوەیکوشتن توومارکریایە.

وتیش لە ساڵ 2020 توومار 663  حالەت کریایە، ولە 2019 توومار 605 حالەت ولە 2018  توومار 530 حالەت کریایە، لە 2017 توومار 462 کریایە و لە 2016 توومار 393 حالەت کریایە.

ردێنی ئاشکەرایکرد، زیایەوبوین ئی دیاردە چوودەو ئەرا بڵاوبوین مادەی هووشبەر و تونوتیژی خیزانی و بیکاری، دیاریکرد، 70% حالەتەگان خونەر تەمەن سی ساڵین  فرەیگیان خاوەن بڕوانامەیش نین.

داوا لە حکومەت عراقی کەێد چارەسەر هووکارەیلی بکەێد ک بویەسە هووکار بڵاوبوین ئی دیاردە لەناو کۆمەڵگا لە ری نەهیشتن بڵاوبوین مادەی هوشبەر و چارەسەر کردن بیکاری و کارکردن وە یاسای تونوتیژی خیزانی.