شەفەق نیوز/ سەرچەوەیگ خۆجێیی لە دیالە، ئمڕوو چوارشەممە، خەوەردا لە مردن و زەخمداربوین ١٣کەس لە رووداو قەڵبەوبوین ماشینیگ لە دەورگرد قەزای بەلەدروز.
سەرچەوەگە ئەرا ئاژانس شەفەق نیوز وت: رووداوەگە لە تەقین تایەر باس بویچگیگ (کەیا) بوی، ١٣ کەس لەناوی بوین فرەیان کەسوکار یەکن، لە بان ری ناحیەی کەنعان- بەلەدروز.
سەرچەوەگە وتیش: چوار کەس گیانیان لەدەس دان و ٩ کەس لە رووداوەگە زەخمداربوین.
و ئاماژە کرد ک دەسەڵاتە ئەمنیەگان لێکۆڵینەوەیگ لە رووداوەگە کردنەو، و کوشیاگ و زەخمدارەیل وەرەو خەسەخانە رەوانە کردن، و وتیش؛ زەخمەیل بڕیگ لەلیان سەختن.