شەفەق نیوز/ حکومەت عراق، ئمڕوو چوارشەممە، شەرمەزار ئەو گورز ئیرانیە کرد ک رەسیە چەن شوینیگ لە ناوچەی سیدەکان باکوور هەولێر پایتەخت هەرێم کوردستان.
وەزارەت دەرەوەی عراق لە بەیاننامیگ رەسیە ئاژانس شەفەق نیوز وت: لە وەختیگ دووپات لەبان بەندەیل دەستوور کەیمن، ک نەبایەت زەوی عراق بوودە بارەگایگ یا رییگ ئەرا هەڕەشەی دەوڵەتەیل هاوسا، لەخود وەختەگە جەخت کەیمن لەبان گرنگی پەنابردن وە دانوسەنین و وەردەوامی نواگردن سەختیەیل تایبەت ئەمنیەیلی، وەوشیوەگ مقەیەتی سەروەری عراق بکەێد، و ئاسایش و ئارامی ناوچەچە جیگر بوود.
شەوەکی ئمڕوو، تووپەیل سوپای پاسداران ئیران، ناحیەی سیدەکان لە باکوور پارێزگای هەولێر پایتەخت هەرێم کوردستان کردنە ئامانج، وەسنگ ئامانجکردن حزبەیلیگ کورد دژوە رژیم تەهران.