شه‌فه‌ق نيوز/ پاريزگاى سه‌ڵاحه‌دين ئه‌وه خسته دروو ك ناحيه‌ى ئسحاقى له باشوور پاريزگاگه تويش په‌لامار هاتوێد له‌لايه‌ن ريكخرياگ تيرۆيستى داعشه‌وه.
له‌ى باوه‌ته‌و، جاسم محه‌مه‌د مه‌جمه‌عى وه‌ڕيه‌وبه‌ر ناحيه‌ى ئسحاقه ئه‌را شه‌فه‌ق نيوز، وت: ئه‌وه‌گ له بڕيگ ماڵپه‌ڕه‌يل هه‌واڵ و ماڵپه‌ڕه‌يل په‌يوه‌ندى كۆمه‌ڵايه‌تى باس كرياگه له‌باره‌ى بارودوخ ئه‌منى له ناحيه‌گه دويره له‌ڕاسى و هه‌وڵيگه ئه‌را دروسكردن بشيوى و ئاژاوه له ناحيه‌گه‌و جيوه‌جيكردن ئامانجيگ تر له به‌رژه‌وه‌ندى گرووپه‌يل تيرۆريستى.
مه‌جمه‌عى باس له‌وه‌يش كرد دوسيه‌ى ئه‌منى له ئسحاقى وه‌ته‌واوى ها له‌ژير كۆنترۆڵ و ده‌ورگرد ناحيه‌گه‌يش كۆنترۆڵ كرياگه وه په‌لاماره‌يليگ ك له‌لايه‌ن هيزه‌يل ئه‌منى و وه‌پشتگيرى رووڵه‌يل عه‌شاير له ناحيه‌گه ئه‌نجام دريانه وه دريژايى ماوه‌يل گوزه‌يشت.